Жена била касната од отровната „риба-зајак“ во Пефкохори: „Влегов во водата и почувствував силна, неподнослива болка“

Детали

вторник, 30 јуни 2026

Жена во Грција била касната од таканаречената отровна риба пуфер позната и како „риба-зајак“, но поминала со полесна повреда. Оваа риба е отровна само ако се јаде, но поради острите заби и силната вилица, може да предизвика сериозни повреди.

Оваа сезона во водите на Грција е забележан зголемен број на таканаречената отровна риба пуфер, народски позната и како „риба-зајак“.

Каснувањето од рибата не предизвикува труење, но таа има многу силна вилица и остри заби, поради кои и го добила името „риба-зајак“, и може да предизвика сериозна повреда.

Рибата е отровна доколку се јаде, па за туристите најголема опасност е каснувањето.

Минатата недела туристка била касната од оваа риба додека се бањала на плажа во Пефкохори.

Како што открива за грчката телевизија ANT1, жената била во близина на брегот – водата ѝ достигнувала едвај до колената.

Вели дека како што влегла во морето, почувствувала силна, неподнослива болка на долниот дел од ногата.

„Реков ’нешто ме гризна и не ме пушта‘ и погледнав надолу и видов огромна риба.

Знаев како изгледа рибата зајак бидејќи бев информирана. Веднаш сфатив дека е таква риба, испаничив и почнав да ја тресам ногата силно, за да ме пушти, бидејќи не сакаше.

Истрчав од водата во шок и почнав да плачам“.

Додека да излезе од водата, рибата ја пуштила, а вели дека имала среќа бидејќи повредата можела да биде многу посериозна.

Рибата ја гризнала на глуждот, а коската ја спречила да загриза подлабоко и да ѝ нанесе посериозна, па дури и трајна штета.

Сепак, рибата оставила голема рана, па на жената ѝ била пружена помош на плажата, а веднаш потоа била пренесена во најблиската болница.

Лекарите ѝ ја санирале раната, ѝ препишале антибиотици, а ѝ дале и вакцина против тетанус.

Жената додава дека е потполно сигурна дека е касната од риба-зајак, а и според раната на ногата било јасно дека повредата е од овој вид.

„Нема шанси да било нешто друго бидејќи јасно ја видов рибата и знам многу добро како изгледа“, додава жената.

Иако искуството на жената звучи страшно, експертите велат дека овие риби се поголема опасност за рибарите и другите риби, отколку за туристите.

Генерално, не напаѓаат ако не се вознемирувани, но биле забележани ситуации кога рибите биле привлечени од светкави предмети, како накит. Бидејќи мислеле дека се храна, се случувало да нападнат.

Но, треба да се нагласи дека во повеќето напади, туристите всушност пробувале да ги хранат рибите, па инциденти како со жената во Пефкохори се многу, многу ретки.

Бидејќи оваа риба е инвазивна и нема свои природни предатори, грчкото Министерство за агрикултура минатата недела сподели дека ќе им плаќа и по 5,33 евра на професионалните рибари за еден килограм од оваа риба.

Целта на оваа програма е да се заштити морскиот екосистем.

Спирова С. | Црнобело