Историски миг за восхит: Првпат во Македонија органи од еден донор спасија четири животи

Детали

четврток, 20 јули 2023

„Благодарение на хуманоста на едно семејство, нивната љубов, добрина и емпатија која ја носат во себе, рано утрово ново срце почна да чука во градите на 40-годишен пациент од Скопје. Нова шанса за живот и црн дроб доби пациент со хронична црнодробна болест, а двајца пациенти на дијализа во текот на денот ќе добијат бубрези“, велат од Министерството за здравство за историскиот миг во македонското здравство.

Министерството за здравство предизвика лавина позитивни реакции кога сподели нова вест за хуманоста на едно семејство која е за восхит.

Тие велат дека утрово (20.07) во Скопје се направени 4 операции со органи од еден донор, со кои се спасени 4 човечки животи.

Тие се заблагодарија на семејството, кое во најтешките моменти за нив покажа несебичност:

„За првпат во историјата на македонското здравство, утрово од еден дарител беа експлантирани четири органи во еден акт.

Благодарение на хуманоста на едно семејство, нивната љубов, добрина и емпатија која ја носат во себе, рано утрово ново срце почна да чука во градите на 40-годишен пациент од Скопје.

Нова шанса за живот и црн дроб доби пациент со хронична црнодробна болест, а двајца пациенти на дијализа во текот на денот ќе добијат бубрези.

Дополнитено шанса за поквалитетен живот наредниве денови ќе добијат пациенти со коскени заболувања.

Уште еднаш благодарност до семејството на донорот кои со нивната несебична одлука ни донесоа утро полно надеж и верба во безусловна добрина.

Благодарност до сите медицински тимови кои изминативе 24 часа работеа и сè уште работат на скопските хируршки и интерни клиники.

На пациентите кои добија органи им посакуваме брзо опоравување. Горди сме на секој нов успех во македонското здравство“, стои во пораката на Министерството.

Овој хуман гест уште еднаш ги разбуди емоциите меѓу Македонците. Тие не кријат колку се восхитуваат на несебичноста на семејството.

Велат дека тие треба да се горди, бидејќи спасиле не 1 туку 4 животи, а на овој начин и нивниот близок ќе продолжи да живее преку луѓето чии животи ги спасил.

А. Ј. | Црнобело / фото: Министерство за здравство