Денес се слави Свети Василиј Велики – Ден за имендени и карневали

Детали

недела, 14 јануари 2024

Честит именден Василиј, Васил, Васе, Василија... Денес е првиот ден од Новата година според стариот календар.

Според Православниот календар денес (14.01) се слави Свети Василиј Велики, или Стара нова година, затоа што овој ден, всушност е 1-ви јануари според стариот календар. Голем број семејства денес слават слава, а именден слават Василиј, Васил, Васе, Василија, Васа...

Името Василиј потекнува од старогрчкиот збор basileus и значел „крал“.

Свети Василиј Велики е архиепископ Кесариски, кој бил роден во времето на царот Константин.

Петнаесет години во Атина ги изучувал филозофијата, реториката, астрономијата и сите други светски науки од тоа време.

Во зрелите години се покрстил во реката Јордан, а 10 години бил епископ на Кесарија Кападокиска.

Василиј бил голем поборник за христијанството, морално чист и исклучително борбен.

Освен што денес се слави именден, во некои градови денес се организираат и карневали.

Па така, на овој празник традиционално се организира и Вевчанскиот карневал, а во Битола традиционално низ улиците се движат и таканаречените Бабари кои облечени во стари алишта прават врева низ улиците.

Се верува дека карневалите се поврзани со паганските обичаи на прослава на новата година и целта е со помош на маските да се протераат старите и лоши духови од минатата година.

Б. С. Б. | Црнобело