Елена Ристеска цел месец немала име, Агнеса прво била Снежана: Како требало да се викаат познатите Македонци?

Водителката Милена Антовска ќе била крстена по баба ѝ

„Моментот на давањето на моето име било интересно, затоа што сум родена во очи Василица.

Па, во игра биле сите имиња поврзани со тој празник.

Дополнително постоело шанса да ми дадат име по баба ми Добринка (на татко ми мајка).

Но, за среќа, таа година најпозната била песната ’Милена генерацијо‘ и мајка ми ме спасила – ме крстиле Милена.

Си го сакам името и не би можела да замислам поинаку да се викам“.

Кумот и родителите на Кристина Димитри со иста идеја

„Моите родители и кумот биле усогласени со името Кристина.

Јас за малку ќе сум се родила во кола на пат за болница (ха-ха).

Упорноста ми е уште пред да се родам, а и тврдоглавост исто.

Инаку, моите имале неколку понудени имиња, но го избрале ова и не погрешиле.

Името ме опишува баш – Кристина е латинско име изведено од грчкиот збор Christos, што значи крстен, оној кој верува во Бог, а има и други значења поврзани со христијанството.

Во својот корен го има зборот Крист (од Исус Христос).

Името Кристина се врзува за чинот на свето крштевање, а ги има и следниве значења: Божја ќерка, онаа која е дар од Бог, жена која самиот Господ ја пуштил меѓу луѓето.

Поврзано со името има и анегдота со мојот брат – тој сакал да се викам Маризабел, но, моите не го послушале.

Затоа сум им лута, ќе имав единствено име - баш како мојата личност. Но, доколку добијам ќерка, тоа ќе биде нејзиното име“.

Фризерот Марјан Петров никој не го вика по име

„Само името Марјан им било дадено на моите од кумот.

Тоа било негова желба и нема некоја приказна зад него.

Но, денес сите мои блиски ме викаат Мани – ретко кој ме вика Марјан“.

Името на пејачката Барбара Поповиќ го избрал татко ѝ

„Моето име ми го има дадено татко ми. Не дозволил на никој да се меша.

Немало ни други идеи, ниту пак опции – Барбара сум од моментот кога моите родители дознале дека чекаат женско.

Приказната зад името е дека никој не пробал да му се спротивстави на татко ми и јас ден денес сум многу благодарна што тој не дозволил ниеден друг предлог.

Јас не можам, а и не сакам да се замислам со друго име. Цел живот истото го кажувам – фала тато“.

Името на баскетџијата Ервин Цого го избрал вујко му кошаркар

„Три имиња биле во избор – Ергин, Едвин и Ервин.

Вујко ми, кој тогаш играл кошарка, прашал дали може да се викам Ервин.

Инаку, колку што знам, Ервин е еврејско име и било многу необично во тоа време“.

Името на професорката и инфлуенсерка Калтрина Круезиу значи „синоличка“

„Името ми го дал татко ми и немало никаква дилема како ќе се викам.

Кога сум се родила, сум имала сини очи, а зборот kaltër на албански јазик значи плава боја, што во превод би било Синоличка.

Јас до шестиот месец сум имала плави очи, но кај некои бебиња бојата се менува, па така сега сум Калтрина со кафени очи.

Честопати ме нервирал фактот што ретко кој од прва ми го запаметил името и презимето, пошто е необично и долго, но сепак не би можела да се замислам со друго име.

Никогаш не ме викале скратено. Си го сакам моето име затоа што не е често и нема кај нас многу Калтрини“.

Пејачот Иван Јованов за малку ќе бил Марко

„Татко ми имал желба да се викам Марко, а мајка ми инсистирала да се викам Иван.

Приказната е дека Јован и Иван е исто, а името Јован (со презимето Јованов) веќе 5 генерации е живо во нашето семејство.

И не можам да си замислам друго име.

Не знам дали од навика или од гордост дека си го сакам името но не не можам да си замислам поинаку да се викам“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело