Вирален статус: „Кога ќе почнете да ја плукате Македонија, сетете се дека не е до земјата, до луѓето е“

Детали

вторник, 18 март 2025

„И оваа земја се вика Македонија – со своите прекрасни планини, езера, реки, плодна почва и традиција богата со вкусни јадења, песни и приказни. Земја што ни дала сè што ни треба за живот, но она што ја прави тешка – тоа сме ние, не таа. Не е до земјата, до луѓето е“.

Маја Дукова е вљубеник во патувања, убава храна и вљубеник во пишаниот збор.

На својот Фејсбук профил таа објави статус во кој освестува колку всушност нашата Македонија е убава и какви богатства има, од добра клима до плодна почва.

И дека кога се случуваат работи кои потсетуваат на трулоста, не е до земјата која ја вреѓаме, туку до луѓето, оние кои дозволуваат да дојде до тоа децении наназад. 

Нејзиниот статус гласи:

„Кога ќе почнете да ја плукате оваа земја, сетете се дека климата е одлична, дека ветровите се благи, дека нема разорни урагани, цунами, торнада, активни вулкани и катастрофални земјотреси.

Ова не е сушна земја, не сте жедни.
Не е неплодна, ако семка падне од џебот – ќе никне нешто.

Шумовита, ридеста, но не е ниту каменеста пустина, ниту џунгла со заразни болести.
Сè е убаво, благородно, питомо...

Тоа ви е од земјата.
Маката е од луѓето.

И оваа земја се вика Македонија – со своите прекрасни планини, езера, реки, плодна почва и традиција богата со вкусни јадења, песни и приказни.

Земја што ни дала сè што ни треба за живот, но она што ја прави тешка – тоа сме ние, не таа.
Не е до земјата, до луѓето е“.

С. С. | Црнобело

фото: CRNOBELO.com - генерирано со AI