Македонка се пожали дека маж ја нападнал на улица: „Ти не си за мајка, вака ли се шета дете?!“

Детали

вторник, 06 јануари 2026

„Излегува повозрасен човек од обложувалниците што се кај Палма, ме застанува и ми вика: ‘Ти не си за мајка да бидеш’. Јас во шок. ‘Види го детето, на ова време вака треба да го носиш? Срамота, срамота...’. Додека се соземам што ми збори човекот, детево се разбуди и се расплака бидејќи некој над глава му вика, притоа непознат, а луѓето кои поминуваа ме гледаа како да сум му направила којзнае што и на моето дете и на човекот“.

Елена од Скопје деновиве доживеа непријатна случка, додека низ скопската населба Аеродром го шетала со своето синче.

Во статусот кој го напиша на Фејсбук, таа ја раскажа ситуацијата поради која се вознемирила и таа, но и бебето, а ѝ се заблагодарува и на жената која застанала да ѝ помогне и да ја смири, додека многу луѓе само ги одминале.

Во својот Фејсбук статус, Елена пишува:

„Никогаш не ја разбрав потребата фрустрацијата од дома да ја истуриш на првиот кој ќе ти дојде. Што се случи?

Го шетам Константин денес на сонцето. На враќање дома, жешко му стана на детето, бидејќи го наоблеков да не му застуди и тој ги извлече топлинките, го истурка ќебето и во меѓувреме заспа.

Нејсе, и мене претопло ми беше, викам 10 минути додека стигнеме дома не е страшно.

Излегува повозрасен човек од тие обложувалниците што се кај Палма, ме застанува и ми вика: ‘Ти не си за мајка да бидеш’. (Јас во шок) ‘Види го детето, на ова време вака треба да го носиш? Срамота, срамота...’.

Јас додека се соземам што ми збори човекот, детево се разбуди и се расплака бидејќи некој над глава му вика, притоа непознат, а луѓето кои поминуваа ме гледаа како да сум му направила којзнае што и на моето дете и на човекот.

Му викам: ‘Господине како можете така да ми се обратите, одминете ме ве молам, јас ниту ве познавам, а ниту сакам совети од вас да слушам’.

Тој: ‘Вие негувателките не сте за мајки да бидете, ќе ги убиете децата, што е ова?’ И мене тука ми дојде мрак пред очи и не слушнав што понатаму збореше.

Јас, нервозна: ‘Да си одиш дома и на твоите ќерки и снаи да им го кажеш истово ова што мене ми го рече. Да се засрамиш на овие години полупијан излегуваш од обложувалница и ми истураш фрустрации. Да се засрамиш старо магаре и да не си ми се обратил уште еднаш зашто ќе те снимам со телефонот и ќе те објавам па сите ќе те видат каков човек си’.

Ми пријде една жена и ми вика ‘Смири се, пијан е изгледа, не се расправај ќе те нападне’.

Ќе ме нападне?

Жалам што само не го извадив телефонот на време за да барем го фотографирам и објавам за да го видат неговите ќерка/син/роднини…

Јас сè уште сум во шок од тоа што некој на улица се дрзнува да ме застане и да ми ги каже сите тие работи. Дури и да не сум добра мајка, кој е тој да ми го каже тоа? И како знае дека не сум добра мајка? А и која е потребата на некој непознат да му делиш совети на улица и притоа да му викаш и навредуваш?

Претпоставувам дома го доживува тоа што мене ми го кажува? Или дома не смее да каже збор, па чекај сега на првиот ќе се истурам? Или изгубил пари во обложувалница, па сакаше да си ја смири нервозата?

Како и да е, моето дете се потресе, мене сè уште ми се тресат раце додека го пишувам ова, а тој? Ќе замине и истото на некој друг ќе го направи.

Благодарна сум бескрајно на жената што застана до мене за да можам да дојдам на себе од шокот и да си го смирам детето“.

А. Ј. | Црнобело /фото: Приватна архива