Трогателни објави од македонската естрада по смртта на Владо Јаневски: „Шепни му на малиот горе дека нема веќе полско цвеќе“

Ребека сподели стара фотографија од неа и Владо, направена на нејзиниот 24-ти роденден.

„Е тука си правевме планови, кај нас дома, во Чаир, на мојот 24-ти роденден. Ти ми кажа дека имаш хит песна за мене. И така бидна Мачо.

Ти благодарам за музиката, дружбите и долгите дискусии за поезија и животот. Патувај кон прегратките на Господа. Царство небесно“, стои во описот.

Тијана Дапчевиќ сподели дека е скршена од болка:

„Другарче мое… мирно патувај кон вечноста. Многу ќе ѝ недостасуваш на твоја „Тијанисимо“… ме искрши“

Тамара Тодевска сподели фотографија од настап на Владо:

„Премногу направено, дадено и оставено… Стиховите на кој не остануваше рамнодушен ќе бидат потврда за твојата вечност и големина.

Ми беше чест што те познавав. Патувај мирно, драг мој Владо“.

И Божидар Божиновски ѝ одаде почит на музичката легенда:

„Почина Владо Јаневски, вечниот романтичар замина во вечноста, а зад себе, зад себе остави генерации кои пораснале со неговите песни и песни кои ќе го најдат патот до новите генерации.

Една од неговите скоро супермоќи беше да не е присутен во медиуми по секоја цена, му даваше аура на мистичност, а за чаршиски муабети отворен простор да нагаѓаат, за жал.

Ја остави и една од најдобрите песни во последниве децении 'Што и да е, ќе помине'. Па еве и животот поминува … Да не помине тоа што оставаме после него.

Нека му е вечна слава и сочувство до семејството“.

Калиопи сподели инсерт од нивниот дует „Во светот на бајките“, со опис:

„Со голема тага ја примивме веста за смртта на Владо Јаневски – уметник кој остави неизбришлива трага во македонската музика. Неговите песни ќе продолжат да живеат и да бидат дел од спомените на многу генерации.Почивај во мир.

Потоа сподели и две фотографии на Инстаграм:

„Ох…Охх,ох, оххх…..

Си замина тивко, без поздрав….

Токму кога најдобрите се најпотребни, ти заминуваш….

Ми беше другар, а јас твојата Каља, како што милуваше да ме викаш…

Многу нешта споделивме во овој живот и во следниот повторно ќе се најдеме….

НЕКОГАШ И НЕГДЕ…“

Спирова С. | Црнобело