Acid Triple - момците кои се здружени со огнот

Детали

четврток, 14 март 2019

Во светот постојат луѓе кои успеваат да го скротат огнот, да му се доближат и да се здружат со него. Но, и ние може да се пофалиме со таква жонглерска група, формирана уште во 2001 година, а е именувана како Acid Triple.

Составена е од Стефан Миладиноски, Марко Трајков, Душан Шешиќ и Огнен Илоски. Нивните перформанси претставуваат комбинација на жонглирање со огин, акробација и fire magic.

„Реквизитите и вештините кои ги користиме не ни дозволуваат да правиме грешки, при мало невнимание и погрешна проценка може да настанат несакани последици. Техниката којашто највнимателно треба да се изведува е исплукување на оган, една од најопасните и највпечатливите“, откриваат членовите на Acid Triple.

За нив перформансите претставуваат можност да ја покажат нивната креативна огнена приказна, којашто ја подготвуваат на тренинзите исполнети со многу дружење, но и напорна работа. Тие сакаат да приредат уникатно искуство за публиката, кое ќе го задржува нивното внимание.

Велат дека убаво е чувството кога по завршување на перформансот ќе им пристапи некој од публиката со позитивни импресии. За нив тоа е едно од нештата што им дава дополнителен мотив за понатамошната работа и посветеност.

https://www.youtube.com/watch?v=jypKrqR5qkM&fbclid=IwAR2BPEa0UIee5xE9YMhyalZT2ndN_0z-zM1F8uIrtSaJDoR7Slg5Y6uvQJ0

„Секоја вештина си има своја тежина и е потребно да се посвети внимание, но доколку постои желба, со вложен труд може за брзо време да се совладаат. Како покомплексни вештини би ги издвоиле contact движењата, каде што е активно целото тело“, додаваат момците од Acid Triple, кои покрај голем број настапи на журки и родендени, имаат настапувано и на Фестивалот на улични уметности Баскерфест во Скопје, настанот Широк сокак во бело, кој е во склоп на Бит Фест – Битола.

Покрај настапите во државата,  Acid Triple настапувале и во Хрватска, Косово, Албанија, Србија, Црна Гора, Романија и на други локации низ Европа.

„Во изминатиот период повеќе ставивме акцент на фотосесии. Како поспецифични и понеобични би ги издвоиле фотосесијата во националниот парк Пелистер, каде што имавме прилика да го испробаме ефектот на оган и снег и фотосесијата во старата Битолска чаршија.

Што се однесува на настапите, во овој период сме ограничени заради временските прилики, затоа што поголемиот дел од настаните се одржуваат во затворен простор, меѓутоа се спремаме со полна пареа за летниот период, во кој настапите се многу побројни.

Во Македонија постои интерес за нашите перформанси, но мислиме дека има простор тоа уште повеќе да се популаризира. Сакаме да допреме до поголем број на луѓе, да дознаат што правиме и оваа уметност да почне почесто да се користи“, споделува групата Acid Triple, кои се подготвуваат за нови перформанси и доживувања во следниот период.

Автор: Евгениј Хоуп | Црнобело