Невена, која работеше на епизода од The Simpsons со лик Македонец: „Уште не ми се верува, среќна сум што ја претставив нашата земја“

„Да бидам дел од една од најдолготрајните и највлијателните анимирани серии на сите времиња, особено серија со која сум пораснала, е искуство кое секој уметник го сонува, но ретко го доживува“, вели за CRNOBELO.com Невена Нешкоска, која имаше можност да работи на епизода од The Simpsons, заедно со нејзините брат и сестра.

Невена Нешкоска е Македонка која живее и работи во САД, а неодамна беше дел од епизода на култната серија The Simpsons.

Заедно со брат ѝ Наум и сестра ѝ Калина, Невена ја претстави Македонија пред светот на мошне уникатен начин.

Епизодата за која станува збор, беше премиерно прикажана на 27-ми април и е во склоп на 36-тата сезона.

Во епизодата, насловена Abe League of Their Moe, се појавува лик кој е бејзбол играч од Македонија и се приклучува на локален тим од градот Спрингфилд.

Невена, Калина и Наум биле вклучени во преводот на сценариото и имале улога на консултанти, а испеале и песна на македонски.

За CRNOBELO.com, Невена открива како се случила целата соработка:

„Соработката започна благодарение на мојата колешка, Кара Талви, која редовно работи на оваа серија. Кара е врвен професионалец, номинирана за Греми и Еми – со неа веќе сме имале успешна соработка во минатото.

Таа беше вклучена во подготовката на серијата. Свесна за одличната синергија која постои помеѓу мене и моите брат и сестра, препозна можност за соработка со нас и ги убеди креаторите на Симпсонови да нè ангажираат.

Така, ја добивме шансата да се вклучиме во преводот на сценариото, изведбата на песната 'Take Me Out to the Ball Game' на македонски и адаптација на некои културни елементи.

Целото искуство беше навистина уникатно и незаборавно. Она што најмногу ме воодушеви беше професионализмот, нивото на организација и ефективноста на сите кои работат на проектот.

Секој аспект беше одработен со највисок возможен стандард, што и се очекува, бидејќи ова е Холивуд. Од подготовките, преку снимањето, до сесијата со актерот Џејми Деметриу, кој го глумеше македонскиот лик, сè беше на највисоко ниво и секој детаљ беше внимателно разгледан и реализиран.

На почетокот, кога ми ја доделија улогата на консултант за дијалогот и вокалите, размислував дека треба да најдеме случаен Македонец кој би можел да го сними гласот за ликот Валков, мислејќи дека најважно е да се постигне совршена интонација и прецизност во изговарањето на македонските зборови.

Меѓутоа, кога го сретнав Џејми Деметриу, веднаш сфатив дека вистински професионалци како него не можат да се заменат со кој било. Тој е искусен актер и вокалист, со големо искуство со voiceover (позајмување глас), што му овозможи да се вклопи во улогата и да го направи ликот Валков автентичен.

Работата со него беше вистинско задоволство – сесијата беше динамична и многу продуктивна, но и покрај тоа, инсистирав на некои детали кои требаа да бидат совршени.

Тоа што го направи Џејми беше многу повеќе од само точен изговор – тој донесе живот во ликот и направи да звучи близу до вистински Македонец. Тоа е нешто што само искуство и вистински професионализам може да го постигне.

Чудно ми е, уште не ми се верува. Најмило што ми беше, и за мене најголемата награда, е што добив шанса да ја претставам Македонија и да внесам елементи од нашата култура.

Можеби некои работи за Македонија не беа претставени онака како што ние би сакале, но сите што гледале барем една епизода од Симпсонови, знаат дека само тоа може и да се очекува.

Како што кажав, не можев да влијаам на оригиналното сценарио, но се потрудив секој аспект од преводот и адаптацијата да биде точен и совршено изведен.

Да бидам дел од една од најдолготрајните и највлијателните анимирани серии на сите времиња, особено серија со која сум пораснала, серија која била дел од моето секојдневие, е искуство кое секој уметник го сонува, но ретко го доживува“.

©CRNOBELO.com Забрането преземање и копирање. Крадењето на авторски текстови е казниво со закон.

Софија Спирова | Црнобело