Ja пееше „Чувам те“ на постар пар во публика: Како си поминав на концертот на Александра Радовиќ во Скопје?

Детали

понеделник, 08 април 2024

„Моите песни се за тажни љубовни приказни, за раскинување, па кога во публика ќе видам пар кој е со децении заедно, не знам што да им испеам, бидејќи тие се доказ дека љубовта постои“, рече на скопскиот концерт Александра Радовиќ и се симна од сцената за да им ја испее „Čuvam te“ на повозрасен пар.

Српската пејачка Александра Радовиќ во саботата (6 април) одржа концерт во Македонската филхармонија, полн со љубов и емоции.

На концертот, кој беше во организација на „Прагма продукција“, таа ги пееше своите балади за раскинување, за скршените срца и поранешни љубови, но и весели песни за надеж дека љубов постои, дури и кога нема да ја најдеш.

Како си поминав на концертот на Александра Радовиќ во Скопје?

Пејачката со еден од најмоќните гласови во регионот, долго време не одржала голем концерт во Скопје. Токму затоа многумина се радуваа на новата средба со неа, за да ги слушнат во живо песните кои се пеат и преку 20 години.

А бидејќи ми е една од омилените, не можам да опишам колку се радував што ќе ја гледам на концерт, но и што неколку недели претходно имав можност да направам интервју со неа.

А Александра ме воодушеви од првиот момент кога излезе на сцената. Вистинска дама со долг црн фустан и црни ракавици, со кренати раце за да ја поздрави публиката.

Уште на првите стихови на песната „Zažmuri“, публиката почна да пее со неа.

На втората песна, неколкумина веќе станаа на нозе, а една девојка застана пред бината, па Александра дојде пред неа и почна да игра и да ѝ пее.

„Многу сакам вакви храбри луѓе. И кога концертот ќе почне весело. Инаку, јас вечерва имам голема трема, но се надевам дека сите ќе уживаме“, кажа таа на почетокот.

А потоа почна да пее дел од своите нови песни, но и старите добропознати хитови, кои ја одбележаа нејзината досегашна кариера.

Како се нижеа песните, така и публиката стануваше да игра, а Александра ги охрабруваше да останат на нозе, дури и кога пееше балади.

„Знаете, моите песни се за некои тажни љубовни приказни, раскинување, па кога во публика ќе видам некој пар кој е повеќе децении заедно, не знам што да им испеам, бидејќи тие се доказ дека љубовта постои.

Некои луѓе ја наоѓаат својата сродна душа на 20 години, некој нема да ја најде никогаш, но Боже мој... Јас, сепак, верувам во љубовта, а следната песна е за господинот и госпоѓата во вториот ред“, рече таа, па се симна од сцената.

Додека одеше кон повозрасниот пар на кој му ја посвети песната „Čuvam te“, од целата сала надолу почнаа да слегуваат фанови за да бидат поблиску до пејачката и да ја снимат емотивната сцена.

А, Александра ги држеше за рака, им пееше седната на столчињата во првиот ред и на крајот му го даде микрофонот на господинот, па тој сам го испеа последниот рефрен на песната.

Но, Александра не брзаше да се врати на бината.

Таа пееше и се движеше низ публиката, позираше за селфи фотки со фановите, се поздравуваше со нив.

Од обожавателка доби и големо кадифено мече, но и цвеќиња од неколку фанови.

„Ви ја дадов целата љубов што ја имам. Се надевам дека уживавте колку и јас“, рече таа на крај, па се врати на бис и ја испеа мојата омилена „Као со у мору“, песната со која ја почна кариерата пред повеќе од 20 години.

Додека го пишувам ова и ги разгледувам фотографиите што ги направив, сфатив и дека немам толку многу фотки во мобилниот... Наместо да снимам, концертот го поминав во уживање, воодушевена од гласот на Александра Радовиќ.

И сега со нетрпение ја чекам следната средба со неа.

Прочитајте и Александра Радовиќ за CRNOBELO: „Се трудам да ја научам ќерка ми на вистинските вредности“

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело

фото: С. Самандов, С. Новески