Гравитациски бранови и уште 5 од најголемите достигнувања во 21-иот век

Развој на mRNA вакцини

Со „обичните“ вакцини, во организмот се вбризгува ослабена форма на вирусот, со што телото стекнува имунитет и потоа е заштитено од идни зарази.

Од друга страна, mRNA вакцините, на некој начин, му даваат инструкција на нашиот организам како да се справи со вирусот, без самиот вирус да биде вбризган.

Првото тестирање на mRNA вакцина на човек почна во 2001 година, а до 2010 година некои компании активно работеа на нив.

Кога почна пандемијата со корона вирусот, се појави потреба од брз развој на вакцина – нешто што не би било можно со стандардните вакцини.

Па, почна масовно да е вложува во истражувања за mRNA вакцините кои, пак, станаа многу поусовршени и имаа важна улога во смирувањето на пандемијата.

Прва фотографија од црна дупка

Ајнштајн го предвидел постоењето на црните дупки со помош на неговата Општа теорија за релативност објавена во 1915 година.

Црните дупки не се дупки, туку многу масивни небесни тела со толку силна гравитација, што не може да ѝ избега ни светлината.

Сто години по објавувањето на теоријата на Ајнштајн, постоењето на овие небесни тела не само што се смета за факт, туку беше направена и првата фотографија од црна дупка.

Со помош на глобалната мрежа радиотелескопи наречена Event Horizon, експертите успеаја да направат фотографија од супермасивната црна дупка која се наоѓа во центарот на галаксијата позната како М87.

Детектирање на гравитациските бранови

Уште еден феномен што го предвидел Алберт Ајнштајн, повторно со Општата теорија за релативност.

Овие бранови се искривување на време-просторот под влијание на гравитацијата – нешто слично како брановите што се појавуваат на површината на водата кога ќе фрлиме камче во неа.

Сепак, и самиот Ајнштајн рекол дека овие бранови се толку мали, што би било невозможно да се детектираат.

Но, во 2016-та, по многу години напорна работа, научниците од MIT и Caltech успешно детектираа гравитациски бранов со помош на детекторот познат како LIGO.

Тие успеаја да детектираат гравитациски бран кој потекнува од судир на две црни дупки.

Бидејќи станува збор за многу масивни тела, нивното влијание врз време-просторот е значително поголемо, па може да се детектираат и гравитациските бранови што ги предизвикуваат.

Спирова С. | Црнобело