Првпат после 800 години, Сатурн и Јупитер ќе се „поклопат“ на ноќното небо - како да ја набљудувате „Божиќната ѕвезда“? (фото)

Денес ќе имаме можност да го погледнеме доближувањето на Сатурн и Јупитер на ноќното небо – феномен познат и како „Божиќна ѕвезда“, а планетите ќе се доближат толку многу, што за нас ќе изгледаат како да се поклопени. Уште подобро е што настанот ќе биде видлив и со голо око.

Денес, 21-ви декември 2020, Сатурн и Јупитер ќе се доближат толку многу на небото што ќе изгледаат како едно небесно тело. Ова е настан што се случува еднаш во неколку векови, па не е ни чудно што љубителите на астрономија ширум светот со нетрпение го очекуваат.

фото: NASA

Се разбира, Јупитер и Сатурн нема да бидат една до друга во Сончевиот систем, но денес Земјата е позиционирана на тој начин, што нам ќе ни изгледаат како една ѕвезда. Во моментот на „поклопувањето“, Сатурн всушност ќе се наоѓа околу 733 милиони километри зад Јупитер.

фото: The Planetary Society

Планетите во Сончевиот систем постојано се „разминуваат“ едни со други, а Јупитер и Сатурн изгледаат како да се „поклопуваат“ еднаш на секои 20 години. Но, денешниот настан е посебен бидејќи планетите не биле толку блиску една до друга речиси 400 години. Истовремено, ова „поклопување“ не се случило навечер дури 800 години.

Уште поинтересно во целата ситуација е што денес е и зимска краткодневица – ова деноноќие денот е најкраток, а ноќта најдолга во текот на цела година.

„Поклопувањето“ ќе се гледа и од кај нас, на северозпадното небо, и ќе биде видливо во периодот од 16:30 до 18 часот. Ако сте во Скопје, поклопувањето ќе се гледа над Крстот на Водно.

фото: NASA

Бидејќи планетите ќе бидат доволно сјајни, ќе можете да го набљудувате настанот и со голо око или двоглед. Ако имате добар телескоп, уште подобро.

фото: The Planetary Society

После 21-ви декември планетите ќе почнат да се оддалечуваат и повторно ќе се доближат една до друга дури во 2080-та година.

Ако не сте во можност да го гледате настанот, можете да следите пренос во живо на видеото во продолжение:

Фотки од Сатурн и Јупитер објавени на EarthSky

Спирова С. | Црнобело