Македонија на прво место на листата со жени-истражувачи на европско ниво – кои земји се после нас?
Според Институтот за статистика на УНЕСКО, во Македонија има повеќе жени истражувачи отколку мажи. Односно, од сите истражувачи во државата, дури 53,4% се жени.
фото: depositphotos.com
Институтот за статистика на УНЕСКО (UIS) собира и анализира податоци од областа на технологијата, образованието, науката, културата и комуникацијата. Во јуни 2020-та тие ги објавија и нивните податоци за застапеноста на жените ширум светот во науката.
Со истражувањето, Институтот дошол до веќе добро познат заклучок – жените се малцинство во светот на науката и во речиси сите држави, има повеќе мажи истражувачи отколку жени.
Но, нивното истражување открива и интересен податок. Кога станува збор за застапеноста на жените во истражувачките дејности во европските држави, Македонија се наоѓа на врвот.
Односно, 53,4% од истражувачите во Македонија се всушност жени.
Овој процент ја става Македонија на првото место на континентот, а веднаш зад нас се Латвија со 52,2% и Србија со 51,4%. Во првите пет се наоѓаат и Црна Гора и Литванија, со 49,9%, односно 49,5%.
„Генерално, жените го сочинуваат малцинството во светот на истражувачите. Оваа брошура ги прикажува глобалните и регионалните профили, нагласувајќи каде жените напредуваат во овој сектор, и каде се во многу мал број“, пишуваат од UIS.
Според добиените податоци, ширум светот, во истражувачката дејност само 30% од истражувачите се жени. Тие се најзастапени во Централна Азија – 48,5% од истражувачите се жени – а најмалку во Јужна и Западна Азија, каде што само 23,1% од истражувачите се жени.
Сличен извештај беше објавен и во 2019-та година, а и тогаш Македонија се наоѓаше на врвот, со 52,3%. Ова значи дека минатата година е забележано подобрување.
Користејќи го извештајот од 2019-та, еден статистичар направи и интересна мапа на која се прикажани податоците.
Милош Поповиќ од Србија е статистичар кој изработува вакви мапи, со кои визуелно прикажува разни податоци, како колку студенти ја напуштиле државата, стапка на смртност од рак и слично, најмногу фокусирајќи се на Европа и Балканот.
„На Интернационалниот ден на жените и девојките научници, мојата мапа ја покажува огромната разлика во бројот на жени истражувачи низ Европа, во проценти“, пишува на објавата за извештајот од УНЕСКО.
Спирова С. | Црнобело / Фото: UIS
Би можело да ве интересира:
Препорачуваме
Најчитани неделава
