Објавени првите фотки од кинескиот ровер Zhurong кој ќе ја истражува површината на Марс (фото)

Кина стана втората зема во светот по САД која успеа да „слета“ на Марс, а деновиве беа објавени првите фотки од кинескиот ровер, кој ќе ја истражува марсовската површина.

Роверот Zhurong слета на Марс на 14-ти мај, како дел од кинеската мисија Tianwen-1. Зад мисијата стои Кинеската национална вселенска администрација, која ги објави и првите фотки од роверот – една во боја и една црно-бела.

Роверот ќе ја истражува мавровската област позната како Utopia Planitia, а на споделените фотографии покрај Zhurong, се гледа и дел од областа.

Фотографијата во боја е направена со помош на камерата за навигација на роверот. На неа можеме да забележиме мал дел од горниот дел на роверот, вклучувајќи ги и неговите соларни панели, како и дел од мавровската површина.

Црно-белата фотографија е направена со помош на камерата за детектирање и избегнување препреки која се наоѓа на предниот дел од роверот, па на неа можеме да го видиме марсовскиот хоризонт.

Со оваа мисија, Кина стана втората земја во светот која успеа да слета на црвената планета. Претходно и Советскиот Сојуз и Европската вселенска агенција се обидоа да го изведат ова, но неуспешно.

На мапата во продолжение можете да погледнете каде се изведени сите успешни слетувања на Марс, вклучувајќи го и она на кинескиот ровер, како и на роверите на НАСА – Curiosity и Perseverance.

Кинеските експерти се надеваат дека роверот ќе биде активен барем 90 марсовски денови, односно околу три месеци. Роверот тежи 240 килограми и е опремен со камери кои му помагаат за навигација, но и кои ќе ја фотографираат марсовската површина. На роверот има и неколку инструменти за проучување на составот на карпите, како и околината и временските услови.

Роверот има и радар за детектирање замрзната вода под површината – исто како роверот Perseverance.

Приземјувачот на Кина со спуштена рампа (лево) и роверот (десно) - слика од компјутерска анимација

Местото каде што слета роверот Utopia Planitia е и локацијата на слетување на приземјувачот од мисијата Viking-2 во 1976 година. Ова беше една од првите мисии на НАСА кои имаа за цел да ја истражуваат Марс, барајќи траги од живот и вода.

Локацијата е всушност огромен кратер со пречник од над 3.000 километри. Наводно, некои докази укажуваат дека во минатото кратерот бил океан. Според податоците од некои сателити, сосема возможно е во кратерот да има и остатоци од мраз.

Спирова С. | Црнобело