Ревиите на првата вечер на Shtip Fashion Days 2025

Детали

недела, 12 октомври 2025

На 10 октомври 2025 година, во организација на Општина Штип, модната сцена во Штип повторно заживеа, времето запре а модата го раскажа својот бесконечен круг. Под блесокот на светлата, симболот на INFINITY оживеа на пистата , почеток и крај споени во едно, приказна што никогаш не престанува да се создава.

Првата вечер ја отвори Eleazar by Маја Кикириткова, колекција создадена целосно од природни материјали. Почетокот беше шокантен и длабоко симболичен, манекенките излегоа на пистата со механички движења, како роботи заробени во светот на синтетиката и потрошувачката мода. Тишина. Само звукот на чекори. Потоа, постепено, се „будеа“  го симнуваа „оклопот“ на вештачкото и се претвораа во луѓе, во слободни, свесни жени. Симболичен протест против заслепеноста на модата, против пластиката и површинскиот сјај. Колекцијата ја пренесе најсилната порака на вечерта: да се вратиме кон природата, кон суштината, кон вистинската убавина.

Следуваше Стефанија Насевска Official со колекцијата „Вечност (Eternity)”, инспирирана од златните маски од Требеништа. Моделите одеа меѓу сенка и светлина, како живи артефакти што ја носат мистиката на минатото и блесокот на модерното време. Секоја креација раскажуваше приказна за вечната женска сила, за убавината што не зависи од тренд, туку од духот што останува.

Потоа GHOST by Alex со колекцијата „Eternal Weave”. Дванаесет модели, дванаесет креации, излегуваа по две, поставувајќи се во круг на сцената. Со синхронизирани движења се прошетуваа една низ друга, создавајќи впечаток на преплетени нишки, живот, љубов, енергија. Потоа, сите заедно почнаа да се движат во круг, вртеж на бескрајноста, каде почетокот и крајот исчезнуваат. Публиката остана без здив. Тоа не беше само ревија, туку визуелна поезија во движење.

OX Streets ја донесе урбаната експлозија на вечерта со колекцијата „The Wear & Tear”. Целиот простор беше исполнет со дим машини, кои го обвија подиумот во магла  како симбол за урбаниот хаос и животот на улицата. Колекцијата е streetwear, без ниту еден класичен аксесоар. Моделите носеа пропсови што го заменуваат луксузот со приказна, секој предмет имаше своја функција, своја порака. „The Wear & Tear“ беше инспирација за повторната употреба, за храброста да се носи реалноста, за убавината на несовршеното.

Вечерта ја заокружија студентите од Универзитет „Гоце Делчев“ – Штип, Технолошко-технички факултет, со две уникатни колекции: „GALAXY” под менторство на проф. Вања Димитриева Кузманоска и „SCULPTA” под менторство на проф. Сања Ристески.

„GALAXY“ ја долови жената како космичко суштество, како ѕвезда што свети дури и во темнината.

 „SCULPTA“ пак, беше омаж на формата, на текстурата, на човечката прецизност. Две колекции што ги споија небото и земјата, токму како што прави и самата мода.

И кога последната манекенка го напушти подиумот, светлата се пригасија.Од звучниците се слушна пулс, ритам што постепено се претвори во музика. Во истиот миг, просторот се исполни со движење, публиката стана дел од пистата, а моделите и гостите се споија во еден ритам.

Започна Afterparty, место каде модата се спои со музиката, каде звукот и движењето создадоа нова форма на уметност. Светлата пулсираа во тон со битот, а секој чекор, секој поглед и секоја насмевка беа доказ дека креативноста нема крај.

Така заврши првиот ден од Shtip Fashion Days 2025 не со точка, туку со ритам што продолжи да одекнува во ноќта.

фото: Владимир Димитров