Како вежба Синди Крафорд за да биде во топ форма на 57 години? (видео)

Детали

петок, 31 март 2023

Светската манекенка Синди Крафорд и на 57 години изгледа совршено и има тело какво што посакуваат и двојно помлади жени од неа. На Инстаграм Стори таа сподели видео што го објавила уште пред три години и покажа како вежба со шпил карти. Оваа вежба е забавна, а Синди призна дека ѝ била омилена кога се породила со првото дете.

Синди Крафорд отсекогаш важела за една од најзгодните топ-модели во светот. Во текот на 90-тите години, додека беше на врвот на славата, Синди сними серија видеа со вежби, кои им ги препорачуваше на жените, а со кои и таа ја одржуваше формата.

Една од овие вежби е со шпил карти.

„Многу сакам пасијанс. Па ајде заедно да ги искористиме картите и за играње и за вежбање“, стои во описот на вежбата.

За оваа вежба ви треба само еден шпил карти и да ги следите овие едноставни чекори:

За секој од четирите знаци – срце, детелина, лист и каро – изберете по една вежба.

На пример правете склекови ако извлечете лист, стомачни вежби секојпат кога ќе извлечете карта со срце, кревајте ги високо колената секогаш кога ќе отворите детелина, а за секоја карта со знакот каро правете чучнувања.

Ова се само примери, вежбите си ги избирате самите.

Измешајте го шпилот карти. Почнете да влечете една по една карта и според симболот и бројот на картата, направете толку повторувања на вежбата.

Асовите значат 11 повторувања на вежбата, а картите на кои има лик (џандар, дама и крал) се бројат по десет.

Крафорд вели дека ова е само една од вежбите што ги практикува често, бидејќи е многу забавна.

Поранешната манекенка сепак не крие дека за нејзиниот изглед освен вежбањето, големо влијание има и исхраната. Таа се храни здраво, внесува многу овошје и зеленчук, и пие многу вода во текот на денот.

А. Ј. | Црнобело