Сакале да ја абортираат првата ќерка, Ким барала да го сместат во институција – Како се распадна бракот меѓу Ким и Канје?

Во декември 2012-та година тие потврдија дека го очекуваат првото дете. А во 2013-та година за првпат се појавија заедно на Мет Гала кога Ким беше бремена во осмиот месец.

Веќе во мај 2013-та година, додека Ким беше бремена, почнаа првите гласини за неверствата на Канје. Канаѓанката Лејла Гобалди тврдеше дека имала секс со Канје двапати, додека Ким била бремена. Канје ги негираше овие тврдења.

Во јуни 2013-та ја добија ќеркичката Норт, а во октомври истата година Канје ѝ предложи брак на стадион во Сан Франциско.

Ким и Канје се венчаа во свечена церемонија во Италија во 2014-та година. Додека беа во брак тие добија уште три деца: Чикаго (6), Сент (3) и Псалм (2). Последните две деца ги добија со помош на сурогат мајка.

За време на бракот имаа подеми и падови. Додека Ким беше жртва на грабеж во Париз, Канје предвреме го заврши концертот во Њујорк за да биде со неговата сопруга.

Сепак, се чини дека сите проблеми во бракот на славната двојка започнаа во 2020-та година кога тој се кандидираше за претседател на САД, а за време на говорот во Северна Каролина откри мошне личен детал дека тој и Ким размислувале да ја абортираат првата ќерка.

По ова, Канје на Твитер објави дека Ким наводно сакала да отиде во Вајоминг заедно со доктор и да се обиде да го стави во институција откако тој „плачел за да ги спаси неговите девојчиња“ јавно и откако признал дека размислувале за абортус.

Канје, сега две години подоцна јавно признава дека направил грешка со таа несреќна изјава што ја дал во Северна Каролина.

„Ја засрамив сопругата така што објавив информации за нашето семејство за време на таа една – и фала Богу – последна прес-конференција. Татко ми само ми рече потоа: ’Сине следниот пат, напиши го говорот‘“ – изјави Канје во своето обраќање по повод Денот на благодарноста во Лос Анџелес.

По ова следеа гласини дека парот веќе се разделил, а на почетокот на 2021-ва година, тие и официјално потврдија дека Ким поднела документи за развод.

Ким речиси една година по поднесувањето на документите за развод сега е во врска со 13 години помладото момче Пит Дејвидсон, но Канје најави дека има намера да се бори за да го спаси бракот, откако претходно го поврзуваа со манекенката Ирина Шајк.

Б. С. Б. | Црнобело