Сара Џесика Паркер (57) со целулит и седа коса на плажа: „Зошто мажите не чувствуваат притисок да изгледаат младо?“

Детали

вторник, 05 јули 2022

По интервјуто за магазинот InStyle каде што зборува за притисокот што го чувствуваат жените да изгледаат младо, Сара Џесика Паркер (57) гордо ги покажа целулитот, опуштената кожа и седата коса на плажа и уште еднаш ги охрабри жените да стареат природно и да си го сакаат телото. 

Сара Џесика Паркер е една од ретките познати жени кои не се срамат од седата коса и промените на телото кои се нормални со годините.

57-годишната актерка одново и одново докажува дека ги прифаќа сите промени што ги носи староста, а неретко изјавува дека воопшто не се грижи за годините.

Деновиве актерката беше забележана на плажа со сопругот Метју Бродерик, уште еднаш покажувајќи дека воопшто не е загрижена за седата коса или целулитот.

Актерката носеше црн, едноделен костим за капење, а косата на која се гледаат седите влакна ѝ беше собрана во неуредна пунџа.

Актерката уживаше во сончевиот ден со книга.

Иако некогаш актерката е критикувана за седата коса и изгледот, секојпат остро возвраќа на критиките истакнувајќи дека стареењето е нормален процес кој сите треба да го прифатат, особено оние во Холивуд.

Пред околу две недели, во интервју за InStyle, Сара повторно прозборе за истата тема, споделувајќи ги нејзините ставови за стареењето.

Актерката вели дека воопшто не мисли на стареењето и смета дека не е во ред што жените чувствуваат притисок да изгледаат младо целиот живот.

Актерката истакнува дека ова не е фер бидејќи мажите сигурно не се соочуваат со истиот притисок.

„Присилена сум да мислам на стареењето поради мојата професија и бидејќи другите луѓе сакаат да размислувам за тоа. Не сум анксиозна за годините. Но, мислам дека оваа анксиозност е честа појава бидејќи сите се фокусираат на жените и стареењето.

Разочарана сум од фактот што, едноставно, не зборуваме за мажите на тој начин. За мене е бизарно што сите сме отворено сексистички настроени за оваа тема“.

Сара вели и дека нејзината незаинтересираност за стареењето не значи дека го игнорира фактот дека нејзиниот изглед се менува со текот на годините. Туку, едноставно, не се оптоварува со тоа.

Во интервјуто, актерката истакнува и дека жените не треба да бидат преоптоварени со изгледот бидејќи луѓето кои се најважни во нивниот живот сигурно не обрнуваат внимание на тоа.

„Кога станува збор за луѓето во вашиот живот, без разлика дали се постари или помлади, сигурно не се грижите колку младолико изгледаат. Сигурно нема да им судите ако имаат брчки или седа коса“.

Спирова С. | Црнобело