Џастин Тимберлејк и Џесика Бил ги обновија брачните завети во тајност – како го спасија бракот по гласините за неверство?

Детали

петок, 21 октомври 2022

По гласините за неверство кои го разнишаа нивниот брак, Џастин Тимберлејк и Џесика Бил успеаја да ги решат проблемите, а летово, по повод 10-тата годишнина од свадбата, во тајност ги обновија нивните брачни завети, и тоа на истото место каде што се венчаа.

Џастин Тимберлејк и Џесика Бил се венчаа во 2012 година во Италија, а годинава ја прославија 10-тата годишнина од свадбата.

По тој повод, актерката и пејачот открија дека летово ги обновиле нивните брачни завети.

Вчера, 20-ти октомври, Џесика сподели неколку фотки со сопругот, а на една од нив таа носи венчаница, а Џастин – костум.

Потоа, со објава на Инстаграм Стори, актерката појасни дека фотографијата е направена летово, кога во тајност ги обновиле нивните брачни завети.

Церемонијата се одржала во Италија, а венчаницата што ја носи Џесика била направена од истиот дизајнер што ѝ ја направи венчаницата за свадбата во 2012-та.

„Бракот со тебе е животна авантура. Те сакам“, пишува под објавата.

И Џастин Тимберлејк сподели неколку фотки со актерката. Повеќето се од нивното секојдневие и двајцата се во лежерно издание.

„10 години не се доволно! Секој ден ме правиш подобар сопруг и татко! Те сакам многу!“, напишал пејачот.

Џастин и Џесика имаат два сина – 7-годишниот Силас и 2-годишниот Финеас.

Во 10-те години што се заедно, парот се соочи со многу предизвици, вклучувајќи и гласини за неверство.

Можеби најголем скандал во нивниот брак беше кога Џастин беше фотографиран како се држи за рака со колешка.

Пејачот веднаш јавно ѝ се извини на актерката и, очигледно, веќе го надминале овој проблем.

Но, според изворите, инцидентот го разнишал нивниот брак.

Набрзо потоа почна пандемијата, а наводно изолирањето во нивниот дом им помогнало да се зближат и, практично да го спасат бракот. 

„Нивниот однос беше влошен, но карантинот беше како благослов – ги зближи. Заедно се изолираа на нивниот ранч во Монтана, уживаа во прошетките во шумата, ловеа риба и правеа други едноставни работи.

Сфатија дека се движат во погрешна насока бидејќи Џесика беше воркахолик, а Џастин не беше најдобриот сопруг. Но, сега си ветија дека никогаш повеќе нема да дозволат нештата да се влошат до тој степен“, изјави близок извор до парот.

Минатата година Џастин беше на мета на критики од јавноста и поради неговото однесување во минатото. Најпрво поради третманот на Бритни Спирс во период кога беа пар, а потоа поради инцидентот на Super Bowl со Џенет Џексон.

Во 2021-ва, пејачот конечно јавно им се извини на двете жени.

Се чини дека Џастин и Џесика успеваат да ги надминат сите проблеми, па и покрај малите скандали, нивниот брак е за пример.

Во мај годинава, актерката откри која е тајната за нивниот стабилен брак:

„За ова е заслужен Џастин бидејќи постојано ми вели: 'Можеби сме во брак, но мора да продолжиме да одиме на состаноци‘. И ова е многу вистинито.

Секогаш наоѓаме време еден за друг и ние сме си приоритет. И, заедно ги правиме работите што ги сакаме. Како што сите знаеме, не е секогаш лесно, но овие моменти ги прават тешките мигови поиздржливи“.

Спирова С. | Црнобело