Застрашувачки видеа: Се сруши патнички авион во Русија со 49 лица – надлежните стравуваат дека нема преживеани

Детали

четврток, 24 јули 2025

Во авионската несреќа во која се случи денес во Русија, надлежните се сомневаат дека загинале сите лица во авионот, вклучително и пет деца. Причината за несреќата уште не е утврдена.

Патнички авион во кој имало 49 лица денес (24.07) се сруши на источниот крај на Русија и надлежните стравуваат дека нема преживеани.

Авионот на авиокомпанијата Angara Airlines патувал кон гратче лоцирано на границата со Кина.

Како што се приближувал до дестинацијата, авионот исчезнал од радарот, а контролорите изгубиле контакт со пилотите. Според некои извори, авионот пробал и да слета пред да исчезне, но безуспешно.

Набрзо потоа, биле лоцирани делови од срушениот авион и според првичната истрага направена од воздух, немало преживеани.

Сепак, надлежните не губат надеж дека можеби ќе бидат најдени преживеани со потемелната истрага на земјата.

Неколку руски медиуми споделија и видеа од несреќата, на кои се гледа како темен чад се издига од густа шума.

Според последните информации, во авионот имало 43 патници, меѓу кои и пет деца. Екипажот, пак, броел шест членови.

Причината за несреќата уште не е утврдена, но можно е да биде и човечка грешка, и технички проблем.

Авионот што се срушил бил модел кој бил познат по својата издржливост и кој често се користел за патувања до далечни области на Русија и Централна Азија.

На Твитер се споделуваат и други фотографии и видеа на кои се гледаат делови од скршениот авион, но и хеликоптери кои се упатени кон местото на несреќата.

Спирова С. | Црнобело