Пар го преживува филмот „50 први состаноци“: Сопругата секој ден му пишува пораки за да знае кој е кога ќе се разбуди – има ретко нарушување

Детали

петок, 26 март 2021

Се сеќавате на романтичната комедија „Педесет први состаноци“ со Дру Баримор и Адам Сендлер од 2004-тата година? Верувале или не, оваа двојка од Викторија, Канада, ја живее приказната на главните карактери од споменатиот филм, Хенри и Луси.

Кристофер Робин Тарнер страда од нарколепсија, невролошко нарушување кое вклучува намалена способност за регулирање на циклусите на спиење, поради што се буди изгубен и ја губи меморијата, па секое утро неговата сопруга Челза мора да му остава пораки до креветот во коишто му го објаснува неговиот живот.

Нарколепсијата како состојба предизвикува мошне живописни соништа и загуба на меморијата при будење. Сопругата на овој 38-годишен Канаѓанец, 28-годишната Челза, мора да остава пораки до креветот во коишто му пишува кој е тој (неговото име), неговата професија, имињата на нивните две кучиња Фокс и Панда и му ја објаснува неговата состојба.

„Таа ми пишува пораки веќе шест години. Ова е навистина љубезно од неа и навистина го ценам тоа, затоа што не е очекувано некој да има целосно разбирање“, вели Кристофер Робин.

„Имаше пeриоди кога ќе се разбудев и не ја препознавав или се врткав низ куќата обидувајќи се да сфатам кој сум, а таа ќе ме прашаше што правам. Неколкупати ми кажала дека сум се разбудил и само сум стоел и сум велел дека не знам каде сум.

Тешко е да се објасни, но имам два до три сона секоја ноќ и тие се толку реалистични и живописни, го преживувам минатото, како некои минати врски и кога ќе се разбудам заглавен сум во минатото и не знам каде сум“, раскажува Кристофер.

Тој понатаму нагласува дека неговите соништа некогаш се толку многу реалистични што ако сонува дека го каснала пчела, тогаш тоа го чувствува и физички.

„Понекогаш сонувам дека пешачам и по неколку километри на камења и кога ќе се разбудам стапалата ме болат. Кога ќе се разбудам, по некое време, моето тело се прилагодува и се враќам“, вели тој.

Самиот Кристофер вели дека луѓето честопати ја споредуваат неговата состојба со филмот „Педесет први состаноци“.

Инаку, тој и неговата сопруга Челза се запознале пред 10 години и тој вели дека тоа било љубов на прв поглед, по што веднаш почнале да живеат заедно, а пет години подоцна стапиле во брак.

Тој нагласува дека од самиот почеток бил искрен со Челза и ѝ ја објаснил состојбата уште од самиот почеток, а напоменува дека голем број нарколептици немаат успешни врски затоа што тоа е мошне тешко за самиот партнер.

Нарколепсијата е ретка состојба во мозокот што предизвикува личноста ненадејно да заспие во несоодветни мигови. Исто така може да предизвика загуба на силата во мускулите што се предизвикува од силни емоции или гласни звуци.

Кристофер за првпат бил дијагностициран кога имал 16 години, кога направил сообраќајна несреќа откако заспал додека возел.

Б. С. Б. | Црнобело