5-годишно дете од САД изоди патека долга 3.500 километри во период од 209 денови (фото+видео)

Детали

среда, 01 септември 2021

Патеката Appalachian во САД е долга околу 3.500 километри, се протега од Џорџија до Мејн и е предизвик за многу планинари и љубители на природата. Но, обично ова се возрасни луѓе со искуство во планинарење кои се подготвуваат со месеци, а некогаш и години за некој ваков подвиг.

Но, Харви Сутон е сосема поразлична приказна – заедно со неговите родители, тој ја изодел целата патека уште пред да наполни шест години.

5-годишниот Харви и неговите родители ја изоделе патеката во период од 209 денови, а стигнале до целта на 9-ти август годинава. Малиот Харви планинарел уште од 2-годишна возраст и колку-толку бил навикнат да оди огромни растојанија, но досега сигурно не се соочил со ваков предизвик.

Секое утро семејството станувало во 5:30 часот, а по појадокот веднаш почнувале со пешачење. Некогаш се соочувале и со бури, а тогаш биле принудени да прават подолги паузи.

Иако начекале секакви временски услови, мајката на Харви вели дека тоа не бил најтешкиот дел од авантурата.

„Мислев дека најтешко ќе ни биде справувањето со студот и горештините. Но, многу потешка беше менталната мотивација и одржувањето на доброто расположение за да му помогнеме на Харви да остане позитивен и да ужива во пешачењето“.

Неретко родителите морале да смислуваат игри по пат за да му го направат искуството на Харви позабавно.

„Не е лесно да останете позитивни кога облеката ви е накисната од дожд и снег. Но мислам дека токму ова направи големи промени во секој од нас“, вели мајка му.

Родителите на Харви работат како агенти за недвижности и велат дека за оваа авантура направиле „мини пензионирање“ од околу една година.

Штом ја изоделе патеката, веднаш се вратиле дома бидејќи веќе биле финансиски истрошени од авантурата, но и бидејќи Харви треба да оди во градинка.

„Харви само што почна да оди во градинка. Па, го очекува нова авантура, сосема поразлична од претходната. Скапо е кога не работиме, па постепено почнуваме да му се враќаме на бизнисот. Притоа, веќе ја планираме следната авантура“, открива мајката.

Семејството направи и видео за целото искуство кое е објавено на нивниот Јутуб канал:

;

Спирова С. | Црнобело