Едната убиена затоа што косата ѝ ѕиркала под хиџабот, а другата затоа што ја врзала во опавче – Кои се жените што станаа симбол на отпорот во Иран?

Детали

понеделник, 26 септември 2022

„Едната беше брутално претепана затоа што не го носела правилно хиџабот, а другата отворено застана со откриена глава и ја собра косата во опавче“ – кои се двете жени што станаа симбол на протестите во Иран, земјата каде девојчињата стапуваат во брак на 13 години, а не смеат да се разведат?

Голем број жени се кренаа на нозе во Иран, на масовни протести против носењето хиџаб, каде две млади жени станаа симбол на протестите, а светот е згрозен од нивното сурово убиство, но и од бруталниот начин на кој тамошните власти се однесуваат кон жените што протестираат. 

Протестите започнаа на 17-ти септември, по смртта на Махса Амини која беше брутално претепана од полицијата, а за време на протестите згасна животот на уште една девојка, која гордо ја фати косата во опавче и одбиваше да носи хиџаб во знак на протест.

Видеото од моментот кога таа ја фати косата во опавче масовно се споделува на социјалните мрежи.

Дополнително, на социјалните мрежи масовно се споделуваат видеа од бруталноста со која властите ги третираат жените во Иран за време на протестите.

Оттука се поставува прашањето: „Како и зошто започнаа протестите?“

Iran, Shiraz, Saturday.
Women are leading this uprising against repression. Forced hijab is the symbol. Removing it is the sign of resistance. https://t.co/DVzMk1D3zv

— Frida Ghitis (@FridaGhitis) September 24, 2022

Протестите започнаа по вестите за смртта на 22-годишната Махса Амини која почина на 16-ти септември додека беше во притвор затоа што го прекршила правилото на Иран за носење марами на главата, или хиџаб.

Младата Махса била во посета на Техеран на 13-ти септември заедно со нејзиниот брат, кога полицијата ја уапсила затоа што наводно ги прекршила строгите правила за хиџаб.

Била уапсена со видливи повреди на главата, по што паднала во кома, а според тврдењата на нејзиното семејство не добила соодветна нега и починала во болницата три дена подоцна.

По погребот на Махса на 17-ти септември почнаа масовно да се оддржуваат анти-хиџаб протести, каде протестантите се судрија со вооружените сили, ги палеа симболите на режимот и хиџабите.

За време на протестите 20-годишната девојка Хадис Наџафи ја врза косата во опавче, а нејзиното видео масовно се споделуваше на социјалните мрежи. По ова „девојката со опавчето“ беше застрелана од 6 залутани куршуми на 21-ви септември.

„Таа имаше само 20 години. Срцето ѝ беше скршено зарaди смртта на Махса Амини. Таа рече дека нема да молчи. Ја убија со шест куршуми“ – рече сестрата на младата девојка.

https://twitter.com/AlinejadMasih/status/1573963922306129920

Инаку, во Иран по исламската револуција од 1979-та година жените задолжително треба да носат хиџаб. Иако имаат право на глас, жените во Иран може да бидат омажени на возраст од 13 години и немаат право да се разведат од сопругот.

Строгите закони ги ограничуваат правата на жените и во поглед на облекувањето, старателството врз децата, правото на наследство и патувањето во странство. 

Во Иран е дозволено младоженецот да побара гинеколошки преглед за неговата невеста за да добие доказ дека таа е невина, а иако имаат право на основно и средно образование, на некои факултети на припадничките на понежниот пол им е строго забранет пристапот. 

Така жените не смеат да се запишуваат на факултети за технички науки и инженерство. 

Голем број активисти што се заложувале за почитување на правата на жените добивале строги затворски казни.

 Б. С. Б. | Црнобело