Зошто седиштата во речиси сите авиони се сини?

Сината боја се поврзува со смиреност и стабилност, плус не се забележуваат нечистотиите и гребаниците на седиштата.

Дали некогаш сте обрнале внимание на бојата на седиштата во авионите? Речиси секогаш се сини и исклучоците од ова правило се реткост.

Можеби верувате дека бојата е поврзана со бојата на небото, но не е толку едноставно.

Зошто авионските седишта се сини?

Според научните истражувања сината боја се поврзува со стабилноста и безбедноста, што е многу важно за патниците кои страдаат од аерофобија. Плус, дури 90% од луѓето атрактивноста на одредена компанија ја проценуваат само според боите на брендот.

За сината боја постои и практично објаснување. На неа не се забележуваат нечистотијата, дамките и гребаниците, па така може да изгледаат добро многу подолго време, отколку што можат седишта во некоја светла боја.

Но, во кабините на бизнис класата сепак може да видите светла нијанса на сината боја, поради тоа што тука летаат помалку патници, па материјалот се оштетува побавно.

Интересно е што во 1970-тите и 1980-тите авиокомпаниите започнале да ставаат црвени седишта. Но, потоа тие биле заменети со сини затоа што црвената боја предизвикала зголемување на агресијата кај патниците.

Платно или кожа?

За седиштата во авионите се користи и платно и вештачка кожа. На пример во авионите што имаат долги прекуокеански летови, седиштата се со платно поради удобност на патниците. Така тие не се потат и не им е некомфорно, а нивната кожа слободно дише.

Но, во авионите што имаат куси летови најчесто има вештачка кожа затоа што таа е поотпорна на нечистотии и при истурање на пијалаци врз неа не остануваат дамки.

Интересно е што навлаката што се става на горниот дел од столицата потекнува од викторијанска Англија, кога мажите користеле многу масло за правење на фризурите и со тоа ги валкале столиците.

За да се избегне ова на столиците започнале да се ставаат вакви навлаки, кои подоцна почнале да се ставаат и во авионите.

Зошто седиштето до прозорецот понекогаш не е до прозорецот?

Авиокомпаниите сакаат да сместат максимален број на седишта во кабините. Па, така иако компаниите што ги произведуваат авионите им даваат препораки за бројот и распоред на седиштата во авионот, речиси ниту една компанија не ги почитува препораките.

Со додавање на седишта се изместува редот, па затоа некои не се веднаш до прозорецот.

Како да го изберете најдоброто место во авионот?

Ако не сакате да слушате врева од моторите на авионот, изберете седиште кое е во предниот дел. Но, тогаш ќе го слушате јасно и гласно секое обраќање на стјуардесите, но тоа најверојатно е подобро отколку моторите.

Исто така, дистрибуцијата на храна започнува од почетокот на авионот, па ќе имате поголем избор.

Ако сте високи, тогаш седнете во близина на излезите за итни ситуации, таму има поголем простор помеѓу седиштата. Но, редот пред излезот за итни случаи не е најдобар избор затоа што седиштата не може да се навалат многу затоа што би пречеле во случај на итна евакуација. Изберете го редот по него.

Прочитајте ги и 9-те тајни за поевтино летање со авиокомпаниите!

С. С. | Црнобело