Брачен кревет со скриен лавиринт – сопствениците на мачки мора да го имаат ова совршено парче мебел (фото)

Од компанијата Catlife го смислиле совршеното парче мебел за оние кои чуваат мачка - брачен кревет, под кој се крие дрвен лавиринт.

Навистина е тешко да ѝ угодите на вашата мачка. Дури и ако купите многу скапо креветче, таа најверојатно ќе си легне во кутијата од него или на вашиот кревет.

Истото важи и за играчки – купувајте колку сакате, но на крај мачката пак ќе си игра со кабли и врвки од патики, а ќе се крие во гардероберот.

Но, дизајнот на компанијата Catlife дефинитивно ќе им биде забавен на сите мачки.

Дизајнерите направиле брачен кревет, под чиј душек се крие дрвен лавиринт за вашето милениче.

„Со нашиот кревет, мачките ќе имаат само своја територија и ќе нема потреба да бараат друго безбедно место за криење. Под креветот ќе најдат тивко и безбедно место, а уште подобро е што дизајнот им е од корист и на сопствениците. Вие ќе можете да си спиете како досега, но сега вашата мачка ќе има уникатно скривалиште“, велат од компанијата.

Сепак, цената на овој кревет е навистина висока – од 2120 до 2650 долари, а во неа е вклучена само дрвената основа со лавиринтот.

Од компанијата велат дека идејата ја добиле уште во 2013-та, обидувајќи се да направат мебел што ќе го сакаат мачките.

Имајќи предвид дека мачките сакаат да истражуваат и да се кријат, направиле неколку дизајни што ќе ги задоволат овие нивни потреби. На крај, го дизајнирале креветот и навистина завршиле одлична работа.

Спирова С. | Црнобело