„Во светот на бајките“, „Народни приказни“, „Салон Хармони“: Македонски серии и филмови кои ќе ве вратат во едни поубави времиња

Детската програма навистина беше богата, разновидна и поучна. Но имаше серии и за постарите генерации кои сè уште ги паметиме.

„Салон Хармони“ и „Погрешно време“ одлично го пресликуваат секојдневниот македонски живот на малите екрани, а во главните улоги беа одлични македонски актери.

За дневната доза хумор беше задолжено, најпознатото македонско трио „К-15“ - незаменливите Миле Паника, Тошо Малерот и Цацко Конопишки и нивниот добро познат хумористично-сатиричен стил.

Првата епизода се емитуваше во 1994 година, а народот ги прифати со отворени раце и широки насмевки. Сè до 2013 година тие нè забавуваа не само со нивните скечеви, туку и познатите музички хитови од „Дуо Трио“.

Покрај К-15, за смеата на македонскиот народ се грижеше и „Ку-Манија“. И тие правеа скечеви инспирирани од македонското секојдневие, а беа смешни и поради нивниот кумановски дијалект.

Покрај многуте серии, Македонија може се пофали и со извонредни мајсторски филмови.

Првите филмови на кои се сеќавам се „Солунските атентатори“ и „Македонска крвава свадба“, еден од најтажните македонски филмови.

Филмот, пак, кој е гордост за многу Македонци, е „Исправи се Делфина“, посветен на охридскиот делфин Атина Бојаџи. Животната приказна за младата пливачка која херојски го преплива каналот Ламанш е снимена во 1977 година, а главната улога ја имаше Неда Арнериќ.

Но, кога се зборува за македонски филм, мора да се спомене и Милчо Маневски и неговите култни дела „Пред дождот“, „Прашина“ и „Сенки“.

„Тетовирање“, „До балчак“ и „Џипси Меџик“ на режисерот Стале Попов се едни од попознатите македонски филмови, кои даваат одличен и реален осврт на важни социјални прашања од македонскиот живот.

Тука е и „Бал-кан-кан“, филм за животот на македонски бегалец кој патува низ Балканот за да ја пронајде својата почината свекрва чие тело е завиткано во тепих. Дарко Митревски е режисер и сценарист на филмот, а Владо Јовановски како Трендафил, Ѕвездана Ангеловска како Ружа и Тони Михајловски како Џанго ги играат главните улоги.

Секако, има уште многу, ама овие се филмови кои останаа во моето сеќавање како убав спомен од моите детски и тинејџерски денови.

Македонскиот тежок живот, легендите за војводите и ајдуците, печалбарството, потрагата по подобар живот и социјалните случување секогаш биле инспирација за многу македонски филмови, кои често прикажуваат вистински приказни на ТВ-екраните.

Денес дел од серии и филмови се репризираат, па во нив може да уживаат и помладите, но и повозрасните да ги гледаат со носталгија.

©CRNOBELO.com Забрането преземање и копирање. Крадењето на авторски текстови  и фотографии е казниво со закон.

И. Ј.| Црнобело