„Во светот на бајките“, „Народни приказни“, „Салон Хармони“: Македонски серии и филмови кои ќе ве вратат во едни поубави времиња

Секако, не смеат да се заборават и лудиот Двојче и паметната Туфи и нивната „Здраво генијалци“. Интересна, забавна, а сепак поучна емисија за малите детски умови, која го држеше нашето внимание пред ТВ-екраните.

А во 19 часот секој ден, Даре нè чекаше на МТВ да ни раскаже да неговите училишни маки. Марија, Кристијан и Филип во улога на Даре и неговите родители секојдневно мамеа насмевки и кај малите и кај старите гледачи.

Даре сонуваше да е познат кошаркар, а мајка му, само сакаше на раат да си го испие кафето. И секако дека се сеќаваме, дека секоја втора реченица на шармантниот Даре почнуваше со „Ама мамо…“ и потоа следеше некој од неговите многу бисери. „Умни глави“ е уште една македонска емисија која беше вистински хит кон крајот на '90-тите.

Но, најпозната, ако не и најомилена, ни беше зградата која зборува - Кармен од „Наше маало“. Го обожававме Мали, а скоро секое девојче потајно беше заљубено во Бени. Диме секогаш нè потсетуваше дека е важно да читаме, а Атиџе и Џелјан ни беа пример за еднаквост и праведност.

Целата емисија беше во духот на другарството, прифаќање на различностите и невината игра на децата, без разлика на националноста.

Нивните авантури, трикови и лудории и сите волшебноста на Кармен беа задолжителни за гледање и не смеевме да пропуштиме ниту една епизода.

Но, детската емисија која го одбележа моето, а и детството на моите врсници, но и на генерациите пред и по нас, е „Бушава азбука“.

Не само што ја научивме азбуката со најзаразната песничка, туку научивме да пишуваме и читаме, граматика, учевме за македонската култура и историја. Серијата има вкупно 31 епизода, по една за секоја буква од азбуката, а секоја епизода трае половина час, а е снимена во 1985 година.

Оваа легендарна серија се смета за најуспешниот ТВ-производ на МТВ.

Македонската архива е полна со многу детски филмови и серии, а вреди да се споменат „Белото циганче“, работена според книгата која ја напиша Видое Подгорец, а улогата на Таруно (белото циганче) на телевизиското платно ја овековечи Рубенс Муратовски.

Но тука се и сериите „Големи и мали“, „Втората смена“, веселата „Девојките на Марко“. Незаборавен ќе остане и Игор Џамбазов со неговата улога на Трајче дрварчето во „Волшебното самарче“. Посебни емоции во мене буди и „Опстанок“.

Продолжува на следната страница...