„Ах, ми недостига времето кога за родендени јадевме ресана и си купувавме моливи, денес родендените чинат 2 плати“
Порано, раните 90-тите, во моите детски години, родендените се славеа едноставно, но навистина весело. На менито традиционално, смоки, соленки и пуканки, а за слатко задоволство наполитанки, ресана и бомбици. Денес - роденденски забави кои чинат скоро две просечни македонски плати за мали деца кои воопшто нема ни да се сеќаваат на овој ден, а меѓу гостите повеќе возрасни отколку дечиња.
Роденден, тоа е денот кое секое дете нестрпливо го очекува, денот кога тоа е во центарот на вниманието на своето семејство, кога другарчињата насмеано го прегрнуваат и носат шарени подароци, денот кога ја добива тортата со омилениот лик од цртаните и денот кога сите му ги тегнат ушињата броејќи ги годините. Е, тоа е и не толку омилениот дел од роденденските традиции.
Родендените се причина за прослава, за смеа, песна и танц, за многу дружење и забава, без разлика колку свеќички славеникот ќе дувне на роденденската торта.
И иако традиционално, секогаш мора да се има торта, подарок и тегнење на уши, како што сè се менува, и роденденските забави се менуваа со текот на годините и децениите.
Оние детски прослави кои некогаш беа симбол на другарство, едноставност и среќа, денес се симбол на статус и лајкови на социјалните мрежи.
Смоки и соленки, тетратка и молив
Порано, раните 90-тите, во моите детски години, родендените се славеа едноставно, но навистина весело. На менито традиционално, смоки, соленки и пуканки, а за слатко задоволство наполитанки, ресана и бомбици.
Секако газиран сок, кој беше дозволен само на тој ден, Кокта и Газоза, а за помалите сок на растворање. Мини сендвичи од багет со шунка и кашкавал, секако кифлички и руската салата, задолжителен додаток на секоја прослава, новогодишна забава, матура или куќна слава.
Тортите големи, направени од вештите раце на мама и баба, украсени со шлаг во бои од кои јазикот три дена по ред беше обоен. Секако, свеќички.
Се играше криенка и брканица, а музика од радио или касетофон. Под декорации се подразбираа хартиени чинии и чаши со омилените ликови од цртаните филмови. А јаготка на шлагот, беше детскиот шампањ.
Подароците, омилениот дел на славеникот, тетратка и молив, кукла, автомобил или сложувалка, а од тетките се знаеше, облека. Врвни подароци беа велосипед или во тоа време, ролшуи.
Пицерии, слаткарници и рамки за слики
Роденденските забави во домашна едноставна атмосфера подоцна беа замените со пицерии и слаткарници, а вистинска атракција беше роденден прославен во Мекдоналдс.
И додека на родендените прославени дома беа поканети голем број на гости, за славењето во пицерија или слаткарница беа со само мал број на најблиски.
https://www.instagram.com/p/CnOkHyPBAvo/
Ресторанот Мекдоналдс во центарот на Скопје беше вистинска атракција во почетокот на 2000-тите. Специјални покани, уште поспецијални подготовки, а сите возбудени за малите изненадувања од роденденското мени.
Едноставните подароци ги заменија кадифени мечиња, музички кутии, рамки за фотографии и парфеми.