Само еден здравствен проблем кај детето и светот ни се руши

Го гледаме нашето малечко исцрпено, нерасположено и беспомошно. Душата ни се кине зошто ова му се случува и дури тогаш сфаќаме дека всушност пред тоа сме биле среќни. Само... Не сме ценеле!

На моменти работите ни одат совршено како по некоја листа за среќен живот од магазин.

Сè штиклирано, доживеано, на тацна послужено и ние пак ќе најдеме некоја ситница и ќе си измислиме проблем.

Зошто? Мислам дека во човековата природа е тоа.

Постојано незадоволни и во трка за повеќе.

Но, тогаш ќе ни се случи нешто. Еве на пример еден минимален здравствен проблем на нашето дете, пример некој вирус. И тогаш всушност сфаќаме колку сме биле среќни пред тоа, колку работите сме си ги земале здраво за готово и колку не сме ги ценеле.

Го гледаме нашето малечко исцрпено, нерасположено и беспомошно. Душата ни се кине зошто ова му се случува и дури тогаш сфаќаме дека всушност пред тоа сме биле среќни.

Сега, ова е немир на душата и причина за (краткотрајна) несреќа.

И потоа повторно го гледаме во одлична форма и си велиме тоа е, толку е, сега ќе ценам сè што имам.

И тоа повторно трае 3 дена. И повторно тука на сцена стапуваат апетитите и трката.

Но, кога ќе кажеме СТОП? Кога ќе застанеме и ќе уживаме во моментот? Кога ќе си кажеме „Да, сега сум на местото на кое отсекогаш посакував да бидам“?

Што е тоа што не ни дава мир и брзаме да грабаме за повеќе?

И дали сите го чувствуваат ова или само дел од нас? Оние со душа немирна, кои знаат дека светот е таму, а ние живееме склопчени само во едно негово мало ќоше...

Секогаш може повеќе, секогаш може подобро...

Но, дали треба да се сетиме дека и секогаш може полошо?

Дека всушност имаме сè што е потребно за срцето да ни пее? Дали треба подобро да ги протриеме очите и да си кажеме „Да, ова ми е доволно за среќа“?

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com