Приказна за 30 секунди: Навистина е прекрасно да те измамат...

Сигурно барем еднаш ви се случило да бидете измамени, без разлика на тоа за каква измама станува збор. Но, дали некогаш сте се запрашале кој е вистинскиот губитник во измамата?

Дали навистина измамениот е тој што е губитник или пак оној кој засекогаш изгубил нечија доверба?

Оваа приказна која ќе ви одземе само 30 секунди ќе ви покаже зошто е прекрасно да бидеш измамен:

„После победата на еден важен турнир, аргентинскиот голф играч Роберт Де Вичензо се упатил кон својот автомобил на паркингот. Во тој миг една жена се доближила до него, му честитала за победата, а потоа во доверба му раскажала како животот на нејзиниот син виси на конец и дека таа нема доволно финансии да ги покрие трошоците во болницата.

Во истиот тој миг, без размислување Роберт и дал дел од своите пари, кои штотуку ги освоил на турнирот.

Една недела подоцна, за време на ручекот во Здружението на професионални голф играчи, Роберт им раскажал на своите пријатели што му се случило на паркингот. Еден од неговите пријатели го прашал дали жената била русокоса со мала лузна под левото око.

Роберт потврдил дека жената изгледала токму така.

„Таа те измамила”, рекол неговиот пријател.

„Таа жена е навистина голем измамник и секогаш ја раскажува таа иста приказна на сите голф играчи.”

„Значи, детето чиј живот виси на конец воопшто не постои?”- прашал Роберт.

„Не постои”- одговорил неговиот пријател.

„Па тоа е најпрекрасното нешто кое го чув оваа недела!” - одговорил Роберт.