За другарка ми од детство - Те сакам моја сродна душо!

Носевме ламбади како мали.

Имавме шнолички со цветчиња во косите и јас ќе ти ја дадев мојата розова, а ти мене твојата сина за да носевме двете една таква, една таква.

Моите родители те сакаа како свое дете и твоите родители мене исто така.

Штом заѕвонеше училиштното ѕвонче веднаш притрчувавме една кај друга за да си споделиме нешто.

Само ние си ги знаевме сите тајни. Дааа, дури и оние „најсрамните“.

Омилено време од денот ми беше кога ќе дојдеше кај мене после часови.

Ги озборувавме сите „шмизли“ и сите „недозреани“ соученици.

Тема ни беа и демоде фризурите на учителките или нивните ужасни модни избори.

Правевме лексикони и пишувавме дневници.

Си кажувавме што сакаме да бидеме кога ќе пораснеме.

Си подарувавме тетратки, стикери, шарени пенкалца.

Дувавме свеќи на родендени, игравме танго и се сликавме, штедливо да не го потрошиме целиот филм во апаратот.

Си плетевме плетенки и се шминкавме.

Се договаравме што ќе си купиме за ужинка.

Си споделувавме што нѐ мачи и што нѐ усреќува.

Цртавме хамери, пишувавме домашни задачи, учевме песнички, сето тоа заедно.

Се поддржувавме дури и кога имавме различни ставови за нешто.

И поминаа години од тогаш...

И мене ми е мило што и денес работите се исти.

Можеби веќе не цртаме заедно на хамери и не носиме ламбади, но подеднакво чисто и искрено се сакаме и си посакуваме само добро.

И денес сме тука да си се ислушаме и да си ветиме дека нема да се напуштиме и во најтешкото.

Тука сме си да си дадеме совети, да си олесниме на душата и да се сетиме на старите добри времиња и да се радуваме на убавите мигови кои допрва ќе дојдат.

Можеби не сме повеќе безгрижните девојчиња со цветчиња во косите, но сме подеднакво блиски како некогаш, подеднакво искрени една со друга како некогаш и подеднакво „зависни“ од присуството на другата во нашиот живот.

И тоа ме радува... Што се уште те имам тебе до себе, моја другарке од детство!

©CRNOBELO.com Забрането преземање и копирање. Крадењето на авторски текстови е казниво со закон.

Автор: С. С. | Црнобело