Денес има повеќе робови од кога било: Статистички факти што ќе ви го променат погледот за светот

Повеќе луѓе умираат додека прават селфи, отколку од напад од ајкула

Сигурно досега сте слушнале за бројни случаи каде што некој загинал додека пробувал да направи селфи фотка на ризично место.

А, студија од 2022 година покажала дека ваквите селфи фотки се поопасни и од ајкули.

Според студијата, претходната деценија биле забележани 90 случаи на фатални напади од ајкула.

Во истиот временски период, дури 379 луѓе загинале пробувајќи да направат опасно селфи.

Во Сан Франциско има повеќе кучиња отколку деца

Овој податок е од постара студија, но наводно е релевантен и денес.

Имено, во Сан Франциско во 2018 година живееле околу 118.000 деца, односно лица под 18 години.

Бројот на кучиња, пак, се движел помеѓу 120.000 и 500.000, додека некои студии сметаат дека најточниот број е околу 232.000 кучиња.

Тоа што животот во градот станува сè поскап оди во прилог на овој тренд – младите парови почесто се одлучуваат да вдомат куче, отколку да станат родители.

Денес има повеќе робови од кој било период во историјата

На ропството гледаме како нешто од далечното минато, но, за жал, тоа е присутно и денес, и тоа повеќе од кога било.

Иако процентот од вкупниот број луѓе на Земјата кои се заробени во модерно ропство е помал, нивниот број е многу поголем отколку во минатото.

Според извештај од 2022 година, денес околу 50 милиони луѓе се робови. За споредба, за време на ропството во САД, биле поробени околу 12,5 милиони Афроамериканци.

Во модерното ропство, околу 28 милиони луѓе се изложени на принудна работа, додека околу 22 милиони се заробени во принудни бракови каде што постои и сексуална експлоатација.

Највонземирувачки е фактот што околу четвртина од модерните робови се деца.

Можеби ропството денес не изгледа како во минатото, но страдањето на луѓето е исто – некои се уценувани, некои се држени присилно, некои биле измамени и оставени без лични документи во странство…

И, заедничко на сите им е дека немаат излез од нивната ситуација.

Спирова С. | Црнобело