„Во време на лаги, кажувањето на вистината е револуционерен чин“ - Се навршија 71 година од смртта на Џорџ Орвел

Можеби името Ерик Артур Блер не ви значи ништо, но Џорџ Орвел сигурно ви буди многу асоцијации. Годинава на 21 јануари се навршија точно 71 година од неговата смрт. Орвел е роден на 25 јуни во 1903 во Бенгал, Индија, а починал на само 46-годишна возраст, во 1950 година.

Тој е еден од најпочитуваните британски автори, најпознат по неговите ремек-дела „Животинска фарма“ – алегорија на политичко уредување и „1984“ дистописки роман инспириран од тоталитаризмот во Европа, односно суровите форми на фашизмот и комунизмот.

Со полно право Орвел е нарекуван литературен херој, гениј и визионер, бидејќи неговата дела се практично безвременски, толку популарни дури и во модерното време во коешто живееме денес.

Во негова чест го имаме и неологизмот „орвелски“ кога сакаме да опишеме ситуација, идеја или социјални услови кои се идентификуваат како деструктивни за благосостојбата и напредокот на слободното и демократското општество.

Орвел бил еден од ретките со строг морален компас и чувство за правда што најдобро се отсликува низ неговите култни цитати кои го премостуваат јазот на времето. Делуваат свежо и актуелно и денес:

„Најефикасниот начин да се уништат луѓето е негирањето и разнебитувањето на нивното разбирање за сопствената историја“.

„Војната е мир, слободата е ропство, незнаењето е моќ“.

„Доколку сакаш да скриеш некоја тајна, тогаш мора да ја скриеш и од самиот себеси“.

„Во време на лаги, кажувањето на вистината е револуционерен чин“.

„Можеби човек не сака да биде толку сакан колку што сака да биде разбран“.

„Изборот на човештвото е помеѓу слободата и среќата, сепак за поголемиот дел од човештвото, среќата звучи подобро.“

„На долг рок, хиерархиско општество е единствено возможно доколку се темели на сиромаштија и лага“.

„Луѓето спијат мирно во своите кревети само поради тоа што суровите луѓе се подготвени за насилство во нивно име.“

„Суштината на тоа да се биде човек е во тоа да не се трага по совршенство“.

„Сите животни се еднакви, но некои животни се поеднакви од другите“.

„Политичкиот јазик е осмислен да прави лагите да звучат вистинито и убиството достојно за почит, и да му се даде цврстина на ветрот во магла“.

(О)Милена | Црнобело