Периоди во животот кога е нормално (и корисно) да се чувствувате изгубено, според психологијата

Ако вашата работа не ве исполнува, може да се чувствувате изгубено. Но, всушност ова е добра вест. Тоа значи дека си признавате дека сакате да најдете нешто постабилно. Во кои други периоди од животот е нормално да се чувствувате изгубено?

Дали во одреден момент во животот се имате почувствувано како да сте риба која излегла надвор од водата, па не знае да се врати назад и се бори да дише?

Како да сте изгубени во секојдневието и не знаете по која патека да тргнете. Веруваме дека многумина потврдно ќе одговорат на ова прашање, а исто така многумина ќе се согласат дека тоа чувство е страшно, нуди несигурност и тага.

Но, добрата вест е што, според психологијата, чувствувањето изгубено во животот во одредени ситуации може да биде добро, иако во тој момент не ви се чини така.

Во кои периоди чувството на „изгубеност“ е навистина корисно?

Кога сте тинејџери и млади

Кога сте тинејџери, мислите дека знаете сè, но по одреден момент кога ќе ви надојдат сите работи, може да чувствувате како целото небо да се урива врз вас и дека нема да имате доволно сила да го издржите целиот тој товар.

Но, кога станувате повозрасни сфаќате дека такви „турбуленции“ всушност ви биле неопходни за да станете постабилни и посилни.

Исто така, чувството на изгубеност може да ја поттикне љубопитноста, да се анализирате себеси, да истражувате нови работи, различни и непознати.

Во такви моменти ви се јавуваат многу прашања кои потоа поттикнуваат нови животни правци и ве обликуваат да станете личноста што сакате да бидете.

Кога поминувате низ фаза на раскинување врска

Раскинувањето врска со личност која ви била поддршка и со која сте ја планирале иднината е една од најтешките работи кои може да ви се случи.

Од раскинување, до разводи или губење на саканата личност, тешко е кога одеднаш ќе се најдете во свет во кој личноста која ви значела многу, повеќе не е во вашиот живот.

По целата таа болка може да се чувствувате изгубено и нецелосно.

Но, откако ќе излезете од тој „тунел“, ќе сфатите дека истовремено сте си направиле простор за нешто поразлично, нешто кое ќе внесе повеќе позитивна енергија во вашиот живот и ќе ви даде нова надеж.

Кога штотуку сте дипломирале

Откако ќе ја добиете дипломата, може да се најдете во реалниот свет, несигурни како да продолжите. Но, не сте сами во тоа.

Повеќето студенти всушност и не знаат во кој правец да тргнат откако ќе завршат со студирањето, а наоѓањето работа е уште еден тежок предизвик.

Сепак, сето ова е голема лекција затоа што дваесеттите се години за експериментирање, за испробување на различни патишта за да видите што е она што ви одговара. Па, во ред е понекогаш да се чувствувате изгубено.

Кога не ве исполнува вашата работа

Иако дваесеттите години на некој начин се наменети за експериментирање, сепак, не значи дека откако ќе наполните триесет или четириесет години, треба волшебно да останете на истата работна позиција со децении.

Во денешно време станува сè повообичаено луѓето да мигрираат помеѓу работни места и индустрии.

Не треба да го поминете животот правејќи исти работи пет (шест) дена во неделата, до денот кога ќе се пензионирате.

Ако вашата работа не ве исполнува, може да се чувствувате изгубено.

Но, всушност ова е добра вест. Тоа значи дека си признавате дека сакате да најдете нешто подобро за вас. Никогаш не е доцна, секогаш може да ги промените вашите патишта.

Преселување во друга земја

Нормално е да се чувствувате изгубено кога ќе се преселите во друга земја. Но, тоа не треба да ви биде пречка да ги остварите вашите соништа.

Преселувањето во странство ве запознава со други култури и ве принудува да растете надвор од вашите граници.

Кога вашите духовни или политички уверувања се променуваат

Не е невозможно да се разнишаат вашите духовни, политички или интелектуални верувања.

Во тој момент може да се чувствувате изгубено и тешко, па да си ги поставите прашањата: Кој сум јас? Во што треба да верувам? Кој сакам да станам?

Но, како што стареете, вие постојано станувате нова верзија на себе, па неизбежен дел од тоа е отфрлувањето на старите верувања и прифаќањето нови.

Запаметете дека таков е вистинскиот раст, тежок и несигурен. Но, на крајот тоа е она што ќе ви помогне да станете подобра верзија од себе.

Чувството на изгубеност најчесто е добра работа. Сè додека правите нешто во врска со тоа - се трудите да истражувате различни животни патеки, одлучувате да се надоградувате или да смените некој аспект од вашиот карактер - од другата страна ќе излезете како посилна и поотпорна верзија на себе.

Со тоа ќе создадете простор за нови искуства, идеи и чувства.

Затоа, не запирајте, истражувајте, па по неколку години може ќе погледнете наназад и ќе кажете: „Сето ова ми вредеше“.

М. Ѓ | Црнобело / фото: freepik.com