6 бонтон правила кои веќе не мора да ги следите – делуваат застарено

Во ред е да ги ставите лактите на масата штом сите завршиле со јадење и не мора мажот да ја плати сметката на романтичен состанок ако сакате да ја поделите.

Како што се менува општеството, се менуваат и нашите навики, нашето однесување…

Па, некои бонтон правила, од денешен аспект може да ни делуваат застарено и излишно.

Ова се правила кои веќе немаат некое значење, па постепено се исфрлаат од употреба, односно во ред е и ако ги прекршите.

Кои бонтон правила веќе делуваат застарено?

Мора да ја прифатите секоја покана што ќе ја добиете

Порано се сметало за навистина неучтиво да одбиете покана за настан, за вечра и слично. Но денес, кога повеќето едвај имаат време за себе, ова бонтон правило повеќе не важи.

Сепак, важно е учтиво и навремено да ја одбиете поканата, односно да ја известите личноста што ве поканила дека нема да бидете во можност да присуствувате.

Не ги ставајте лактите на масата

Денес јадењето со друштво во ресторан не мора да е формален настан бидејќи веќе е секојдневие. Па, правилото за лактите на масата претрпело некои промени.

Односно, штом веќе сите завршиле со јадење и само разговарате со друштвото со пијачка, во ред е да ги потпрете лактите на масата.

Но, избегнувајте го ова додека другите јадат.

Треба да пристигнете рано на настани

Никогаш не е во ред да доцните, но не е во ред да пристигнете и половина час порано.

Ако, на пример, некој ве викнал на гости во 20 часот, а вие отидете уште пред 19:30, тогаш само ќе му пречите додека се подготвува.

Истото важи и за јавни настани. Доволно е да сте десетина минути порано или точно на време.

Мора да ја изедете целата храна во чинијата

Повеќето луѓе имаат „трауми“ од детството од родителите, бабите и дедовците кои ги терале да изедат сè од чинијата.

Всушност, ова се сметало за бонтон правило со години, особено ако некој друг ви го направи јадењето.

Но, денес е јасно дека прејадувањето не му користи на никој и правилото дека мора да изедете сè веќе не важи.

Мора да ја извадите капата кога влегувате некаде

Ова бонтон правило не е целосно искоренето, но е малку променето, односно адаптирано за помодерно време.

Во ред е да не ја извадите капата ако одите на ручек со пријател или кога сте во опуштено опкружување.

Но, препорачливо е да не носите капа на настани со дрес код, на интервју за работа и генерално места каде што треба да покажете учтивост и почит.

Мажот треба да ја плати сметката во ресторан

Во ред е ако мажот сака да ја плати сметката во ресторан, но исто така во ред е и ако сметката ја подели со партнерката или, пак, дозволи да плати само таа.

Во ера кога се бориме за рамноправност, правилото дека мажот треба да плати секогаш, веќе е застарено.

Спирова С. | Црнобело