10 нешта од 2018-та кои сигурно нема да ни недостигаат

Лажни вести, изрежирани селебрити драми, тужби, опасни предизвици и бескрајни дебати дали е „Laurel“ или „Yanny“, тоа е 2018-та накратко.

Секоја година носи и интересни и неинтересни моменти, а ова е избор од 10 нешта што сигурно сакаме да ги оставиме да си одат, заедно со 2018-та.

Нетрпеливоста меѓу Кејти Пери и Тејлор Свифт

Тензијата меѓу нив трае уште од 2013-та или 2014-та година, но се чини дека во 2018-та и двете решија да ја „олабават“ јавноста со нивната караница.

Опасниот „Tide Pod Challenge“

Неколку тинејџери во 2017-та се пошегуваа дека би ги јаделе капсулите за перење на „Tide“, а тоа кулминираше со предупредување од Американската асоцијација за контрола на отрови да не се консумираат овие детергенти.

Расистичките твитови на Розен Бар во време на римејкот на „Розен“

Кога римејкот на познатото шоу беше најавен, публиката беше воодушевена. Но, сето тоа пропадна во мрак по расистичките твитови на Розен за Валери Џерет, поранешна советничка на Обама.

Пластичните цевки за пиење

Во многу делови во светот веќе е забранета употребата на пластични цевки за пиење и тие се заменети со други, изработени од материјали кои се рециклираат и се биоразградливи. Во Калифорнија, на пример, пластична цевка гостинот може да добие само ако самиот си ја побара.

Ноќна пеперутка која ја најде вистинската љубов

Фотографија од ноќна пеперутка на прозорец, со „потресен“ опис за вистинската љубов извесно време беше хит на интернет. Сепак, секоја ноќна пеперутка е привлечена од светлина и не е воопшто чудно да се „залепи“ за стакло од кое таа доаѓа.

„Yanny“ или „Laurel“?

Ова е звучната верзија на синиот фустан со црни тантели кои некои го гледаа како бел со златни тантели. Дебатата дали на звучната снимка се вели „Yanny“ или „Laurel“ и понатаму трае во коментари на Јутјуб, Фејсбук, Твитер, Редит...

Малите очила за сонце

По години и години носење големи очила за сонце, кои го кријат поголемиот дел од лицето, модната индустрија оваа година се обиде да лансира мали тенки очила. Очигледно, не успеаја да ја оивеат модата од 90-тите.

Јутјубери во јапонската шума на смртта

Влогерот Логан Пол ја посети шумата на смртта и самоубиствата и сними мртво тело. Веднаш против него се крена петиција, која ја потпишаа 700.000 луѓе, со барање тој да го избрише видеото. Веднаш потоа, гледаноста на неговиот канал паднала за цели 47%, а од Јутјуб одлучиле да не му го бришат профилот, но да ги прекинат сите соработки со него.

Храна со светки

Постојат светки кои се јадливи, но има и такви кои само не се отровни, а служат за декорација. Светките беа огромен хит во 2018 година, особено за видеа и фотографии од храна на Инстаграм. Сепак, нема да ни недостигаат сите тие уништени порции храна за само визуелно поблескав ефект.

Шорцеви на црвениот тепих

Ким Кардашијан и Џиџи Хадид носеа шорцеви на црвениот тепих, но таа мода на многумина не им се допадна. Сепак, треба да се задржи вкусот кога се работи за облекување при официјални пригоди.

Е. Д. | Црнобело