Како да се справите со луѓе кои премногу зборуваат?

На работа, во друштво, во јавен превоз, разговорите течат многу лесно, но кога ќе преминат во монолози, некогаш тоа може да биде навистина иритирачко.

Уште повеќе иритира ако двајца муабетџии се зазборуваат, особено кога сте на работа, а не излегуваат на пауза, туку продолжуваат во канцеларијата. Не секој сака да го слуша тој разговор и ако имате нешто да си кажете со некој од колегите, направете го тоа во просторијата за јадење или излезете на пауза.

Но, што да направите ако сакате да го заштитите својот простор и да им кажете на другите дека ви треба мир и тишина, а не разговор, и да не излезете вистински кретен?

Некогаш, проблем е и самата околина. Отворениот тип на канцеларии ги прави вработените посоцијални, но од друга страна таа социјализација може да пречи на други. На некои им треба мир и тишина, а бучавата им пречи и не можат да бидат продуктивни.

Ако сте тивок тип на човек, ова може да ви се случува насекаде, а не само во работа. Сигурно ви е непријатно да „скршите“ каков било муабет, но не сакате да ги слушате ниту туѓите.

Најлесен начин да се справите со овој проблем кога сте на работа е да ги замолите колегите да разговараат на потивок тон. Во јавен превоз немате многу избор, но секогаш можете да си помогнете со слушалки и избор на музика која ви се допаѓа. На големи собири исто така не е лесно да се издржи, па обидете се да не бидете во фокусот на настаните, доколку сакате да не ви се обраќаат.

Е. Д. | Црнобело