Најголемите причинители на стравот од неуспех

Стравот е постојан дел од нашиот живот. Тој успева да нè спаси од многу опасни ситуации и да нè спречи да постапиме онака како што инстинктот нè тера.

Луѓето денеска се плашат од многу работи: од пестициди, од фармацевтска мафија, од епидемии, од вакцини, од отказ, од погрешни одлуки... Секој од овие стравови на еден или друг начин може да се надмине, освен еден, кој е претерано комплициран - стравот од неуспех.

Никој не сака неуспех

Многу е јасно дека никој од нас не би избрал да биде неуспешен. Но, кога се зборува за страв од неуспех, не се мисли на оној кој се појавува кога треба да направиме чекор напред, бидејќи тоа е трема. Стравот од неуспех нè спречува да бидеме најдобрата верзија на себе.

Поради тоа избегнуваме многу предизвици во кои би можеле да згрешиме, но во исто време и пропуштаме навистина добри прилики.

Ова се најчестите причини зошто се плашиме од неуспех:

Искуства од детството

Премногу критичните родители ги одгледуваат своите деца врз основа на ултиматуми за неприкосновена почит, кои се базираат на стравови кои влегуваат „во коски“ кај децата. Ако сте вака одгледани, можно е постојано да ви е потребно одобрување од авторитетите.

Негативен перфекционизам

Перфекционизмот оди „рамо до рамо“ со стравот од неуспех. Во главата на перфекционистите, неуспехот е толку страшна точка, што треба да се избегне по секоја цена - дури и ако тоа значи да се испушти некоја можност за напредување. Кај овие луѓе постои стравот дека никогаш нема да успеат да бидат доволно добри во тоа што го прават.

Недостаток на самодоверба

Лицата со висока самодоверба се свесни дека и неуспехот е составен дел од животот. Наспроти тоа, луѓето со слаба самодоверба сакаат да ги избегнуваат ризиците и да играат на сигурно.

Поистоветување на вредноста со резултатите

Некои луѓе се склони својата вредност да ја поистоветуваат со резултатите кои ги постигнуваат во одредена област. Но, на тој начин само го загрозуваат сопствениот идентитет и самодовербата. Нашата вредност не треба да зависи од грешките кои ги правиме во живот.

Е. Д. | Црнобело