Громогласните '20ти години и влијанието на ерата на џезот на денешницата

Кога ги гледаме фотографиите и илустрациите од 20-те години, гледаме еден див свет на забава, девојки облечени во пердуви и фустани, боб фризури, екстатична смеа и развратен танц. Но како и зошто 20-те години биле громогласни и зошто биле толку уникатни и влијателни? 

Во текот на овие години, промените во светот се одвивале со брзо темпо. Социјалниот пресврт во комбинација со младешката повоена еуфорија и зајакнување на женските права довеле до фундаментални промени и уривање на граници во таа деценија.

Ерата на џезот била полна со бунтовна спонтаност, импровизација и возбудливи иновации. Младата, слободната жена била храбра да пие и да пуши, да танцува додека нејзиниот фустан не и ги открие нозете и бунтовниот дух.

Токму во овие години почнала да се развива модерната женска гардероба. Заврши времето на тесните корсети, долгите, непрактични фустани и сложените фризури и капи. Во 20-те години почнуваат да се носат пократки фустани со ниски струкови и боб фризури кои лесно се одржуваат.

Во тоа време се популарни и свилени пижами кои се носат на домашните забави или на плажи. Честа е и облека со кинески и египетски мотиви, како и накит, благодарение на големото откривање на гробницата на Тутанкамон во 1922 година.

Исчезнува поделбата на типично машки и типично женски стил на облекување (Коко Шанел дури носела и панталони). Се менуваат и идеалите за убавината, женската фигура со облини е заменета со момчешка фигура.

Стиловите стануваат сеопфатни, а боб фризурата станува симбол на слобода, женственост и самодоверба.

Во тоа време се појавува и филмот, со што трендовите стануваат достапни за секого. Холивуд ги пласира филмските ѕвезди, како Глорија Свансон и Клара Боу, кои имале можност да се истакнат со оригиналност и на тој начин да влијаат врз толпата.

Спортистите, исто така, имале удел во овие промени, па така тенисот стана повеќе од елегантна разонода. Со појавата на француската тенисерка, Сузан Ленглен, женската игра добива силен и брз стил.

Ленглен играла тенис во модерна гардероба, свилени тесни фустани во црвена или портокалова боја, имала навика да пуши и да пие коњак пред публиката, а го добила и прекарот „божица“.

Тоа било време на ослободување и укинување на рестрикции и табуа. Жените за прв пат добиле право на глас, а се создаде и деловна жена.

Забавата траела десет години и „скокна во спектакуларната смрт во октомври, 1929 година“.

Брилијантна и трагична, убава, но проколната, емоционално банкротирана и изгубена генерација-така најчесто ги опишуваат громогласните 20-ти.

Со својата естетиката и прогресија, џез ерата, без сомнение, останува една од најинтересните и културно највлијателните ери.

Ашера | Црнобело