Сте слушнале ли за „Книги за пријателство" или Фејсбук на 16-от век?

Во шеснаесеттиот век благородниците од северна Европа биле далеку пред своето време, што се однесува до друштвените мрежи. Во 1560 година младите луѓе од денешна Холандија и областа околу Рајна не разменувале дигитални „лајкови“ и „твитови“, но имале начин да ги споделат своите мисли и коментари, да бараат совети и да уживаат во одредена песна која се слушала во тоа време. Ова било нарекувано „alba amicorum“ или во превод „книга за пријателство“.

Овој тренд го започнале младите мажи кои ги напуштиле своите домови за да патуваат низ Европа и да ги посетат научниците и универзитетите, како дел од нивното високо образование.

Кога би се сретнале со филозоф, научник или колега, им давале книги за пријателство за да напишат кратка забелешка, за да го документираат состанокот. Се ангажирале и истакнатите уметници за додавање на илустрации во овие книги.

Жените во тоа време најчесто немале можност да патуваат, но и тие воделе книги за пријателства кои биле повеќе лични и кои откривале повеќе од оние што ги собирале мажите.

Во нивните книги тие цртале, споделувале тајни, пишувале шеги и ги озборувале нивните љубовни кандидати. Како резултат на префрлањето од пријателка на пријателка, овие книги биле помалку фотогенични и уредни за разлика од машките книги.

Женските книги за пријателство обично биле полни со грди, пренатрупани страници каде што повеќе од 15 луѓе го пишувале своето име, мото или кратка изрека.

Наместо линкови и гифови книгите го содржеле текстот на новата, популарна песна, лична поезија или илустрација. Се пишувале и заеднички белешки кога некој би стапил во брак.

Книгата на пријателство била начин да се покаже кој бил популарен, колку имал пријатели, познаници и други општествени врски. Како и модерните друштвени мрежи, но повеќе илустрирани и повеќе луксузни.

Ашера | Црнобело