Во брак се 60 години, а лизгаат уште подолго - Парот што го воодушеви целиот свет

Олег има 83 години, а Људмила 80. Во брак се речиси 60 години, а се занимаваат со уметничко лизгање уште подолго.

Олег Протопопов го поминал своето тешко детство во поранешен Ленинград, денешен Санкт Петербург. Од 1941-ва до 1944-та година, градот бил под нацистичка опсада.

Во овој суров период згаснале многу животи – некои од бомбардирање, некои од глад и од студените зими.

Сепак, со натчовечки напори, таткото на Олег успеал да ги извлече својот син и својата сопруга од речиси уништениот Ленинград.

Кога Олег имал 15 години, како подарок ги добил своите први лизгалки за мраз.

Помладата Људмила Белоусова, имала 16 години кога прв пат облека лизгалки, а се вљубила во спортот гледајќи го австрискиот филм „Frühling auf dem Eis“ (Пролет на мраз).

Људмила и Олег се запознале во 1954-та година и почнале заедно да тренираат. Поради сличните интереси и заедничките соништа, помеѓу нив се родила љубов.

Следната година, Људмила ги напуштила студиите во Москва и се преселила во Ленинград. Овде, Олег го служел неговиот воен рок.

Секој слободен момент го минувале заедно, на мразот, а оваа посветеност не поминала незабележана. Олег и Људмила го освоија првиот олимписки златен медал, за тогашниот Советски Сојуз, во 1964-та година.

Тогаш 31-годишниот Олег, бил најстариот натпреварувач за уметничко лизгање.

На следните Олимписки игри, парот го повторил својот успех. Всушност, тие четири години по ред освојувале златни медали на Европското и Светското првенство.

Сепак, животот имал други планови за нив.

Одеднаш, вљубениот пар станал проблем за комунистичкиот режим, бидејќи одбивале да се откажат од пријателството со спортскиот новинар Аркадиј Галински. Проблемот бил што новинарот бил прогласен за државен непријател.

Штом сфатиле дека таму повеќе нема живот за нив, решиле да преземат нешто. За време на турнеја во 1979-та година, парот останал во Швајцарија и побарал политички азил.

Решиле да се преселат во мало швајцарско село, но повеќе не се натпреварувале. Сепак, парот организирал кампови за уметничко лизгање и ги подучувале љубителите на овој спорт.

Во нивната татковина биле прогласени за предавници, а нивните имиња биле избришани од советските дневници за освоени медали. Дури многу години подоцна, на парот му биле вратени правата и признанијата што им биле одземени.

После цели 23 години во странство, Олег и Људмила за прв ја посетиле Русија – биле повикани од славниот хокеј играч Вјачеслав Фетисов.

Парот придонел многу за уметничкото лизгање, а изведувале и три варијации на таканаречената „спирала на смртта“.

Експертите за овој спорт нагласуваат дека Олег и Људмила се големи лизгачи, не само поради освоените медали, туку и поради нивното влијание врз спортот.

Но, нивната приказна не завршува овде и тие повторно го воодушевија светот во 2015-та година. 51 година после освојувањето на првиот златен медал, парот се појави на ревијата на мраз „Вечер со шампиони“, која се одржува на Универзитетот Харвард.

Можеби веќе годините не им дозволуваат да ги изведуваат опасните пируети и скокови, но Олег и Људмила сѐ уште можат да ги облечат костимите од младоста, стари половина век, и да ја остават публиката без збор.

Спирова С. | Црнобело