„Не отворај чадор во затворен простор“ - Од каде потекнува познатото суеверие?

Црните мачки и скршените огледала се во иста категорија со чадорите во затворен простор - толку долго време се верува дека носат несреќа, што многумина веќе не ни прашуваат кога и како настанале овие суеверија.

Според едно објаснување, Египќаните се „виновни“ за случајот со чадорите. 

Првиот чадор всушност бил чадор за сонце и немал никаква врска со дождот. Богатите Египќани носеле чадори направени од папирус и пердуви, кои служеле како симбол за нивниот статус.

Наводно, отворањето на нивните чадори во затворен простор би го налутило богот на сонцето, Ра, поради што би трпеле тешки последици.

Постои уште една теорија за несреќата што ја носи отворен чадор, која исто така вклучува египетско божество. Египќаните изработувале чадори за сонце во знак на благодарност на божицата на небото, Нут, која со нејзината сенка ги заштитувала жителите од топлина, суша и жед. Светите чадори можеле да ги допрат само избраните луѓе.

Покрај тоа, жителите на Индија и Кина, исто така сметале дека отворените чадори за сонце го симболизирале небото.

Современите чадори потекнуваат од средината на 19 век, кога Семјуел Фокс го патентирал Paragon - модел со челична рамка и ткаенини како што се свила, памук и лен, како и механизам што го олеснува отворањето.

Чадорот на Фокс се отворал многу полесно од неговите претходници, кои биле изработени со коски од кит или трска, поради што многу лесно луѓето можеле да се повредат. Во затворен простор, пак, ризикот од повреда бил уште поголем.

Најверојатно, во тоа време било создадено ова суеверие, со цел да се подигне свеста за ризикот од повреда. Што значи, отворањето чадор во затворен простор не носи несреќа, туку повреда.

Ашера | Црнобело