5 најевтини земји во светот каде што луѓето се пензионираат покрај море

Статистиката во САД покажува дека сè поголем број на Американци решаваат да се пензионираат надвор од границите на матичната држава. Дури 8,7 милиони луѓе се отселиле во странство после пензионирањето. 

Зошто го прават тоа? Која е причината?

Ниските цени и подобриот стандард на живеење, особено во онаа доба од животот кога навистина ви е доста од сè, а главниот приоритет ви е коктел со поглед на море. Доколку се пронајдовте во описот, било да сте 25-годишни или пак пензионери, веројатно барем еднаш во животот ви поминала мислата колку би било убаво да живеете покрај море и плажа.

Ова е списокот на земји коишто се финансиски пристапни кога станува збор за живеалишта, комунални услуги, превозот и храната. За самец, месечните трошоци за живот изнесуваат под илјада евра. Доколку на прв поглед тоа ви изгледа како премногу споредено со нашите простори, сепак потсетете се дека ќе живеете во тропска земја како од разгледница.

Костарика

Оваа држава лоцирана во средниот дел на Америка е „Мека“ за иселениците од целиот свет. На шпански „Costa rica“ означува „Богата земја“, што сосема си ја оправдува симболиката. Костарика е омилената дестинација за пензионирање поради начинот на живот кој подразбира умерено темпо, а главната грижа во денот ќе ви биде дали ќе го уловите зајдисонцето.

Ова воедно е и најевтината земја кога станува збор за недвижности покрај вода. Умерена клима, многу зеленило и природа, многу ресторани со вкусна храна и квалитетна здравствена заштита. Патиштата можеби не се најсјајни во сите делови од земјата, но токму поради сето ова, Костарика е автентично парче рај на земјата.

Панама

Уште еден скапоцен камен во централна Америка, омилен помеѓу доселениците кои доаѓаат од север. Добивањето на жителство е релативно лесно, а и Панама слично како и Костарика може да се пофали со квалитетни здравствени установи. Голем дел од населението зборува англиски и се користи американскиот долар како валута.

Освен гостопримливоста кон дојденците, градовите во Панама се многу динамични и возбудливи, со богат друштвен живот. Плажите се апсолутно прекрасни, а може да живеете со 800 евра месечно.

Камбоџа

Доколку размислувате за Азија како дестинација каде што би можеле поволно да се пензионирате, Камбоџа е можеби далеку, но прекрасната природа, културата и храната ќе ја надоместат оддалеченоста изразена во километри.

Дури 3 години по ред, Камбоџа е прогласена за најдоброто место за живеење според категоријата трошоци за живот. Тука ќе пронајдете истомисленици кои се одлучиле за евтин и возбудлив живот во непозната земја. Во главниот град Пном Пен може да најдете модерно уреден еднособен стан за само 200 евра, а многумина се одлучуваат да се пензионираат во модерното одморалиште Кеп.

Еквадор

Повторно се враќаме, овој пат малку подолу во Америка. По Костарика и Панама, главниот адут за пензионери е евтиниот живот во Еквадор, држава во северозападниот дел на Јужна Америка, лоцирана на брегот на Тихиот океан. Километри и километри долги плажи и насекаде насмеани лица.

Ова е земја со евтин стандард и со многу свежо овошје и зеленчук. Еквадорската авантура може да ја започнете во Cuenca, некои пак се упатуваат директно кон океанот, а други одбираат шармантни мали рибарски гратчиња за своите пензионерски денови.

Португалија

Конечно, европска земја. Португалија е „на цена“ поради прекрасните километарски плажи, симпатичните рибарски селца и можноста да се ужива покрај вода. Доселениците ја сакаат поради квалитетниот живот и можностите коишто ги нуди Португалија. Мафра и Ерицеира се двете најпосакувани португалски дестинации кога станува збор за пензионирање, исполнети со живот и смеа.

(О)Милена | Црнобело