Што забележуваат прво гостите во вашиот тоалет, кујна, дневна соба?

Тоалет, кујна, детска соба, спална соба, дневна соба, домашна канцеларија – во што прво „зјапаат“ луѓето кога ќе дојдат на гости кај вас дома, а на што обрнуваат најмалку внимание?

Истражувањето на британскиот сајт за анализа Confused.com открива што забележуваат прво гостите кога го посетуваат вашиот дом.

Со специјална технологија за следење на очите тие откриваат кои делови од собите во вашиот дом најмногу го привлекуваат вниманието на посетителите.

На што се фокусираат гостите во собите во вашиот дом најмногу, а на што најмалку?

Тоалет

На врвот на листата е огледалото. Потоа следуваат фиоките односно плакарчето кај мијалникот, па мијалникот, плочките, тоалетната шолја, па тушот, па прозорчето во тоалетот, се разбира доколку има такво.

Најмалку внимание се посветува на осветлувањето, чешмите и држачот за тоалетна хартија.

Детска соба

На врвот на листата е креветот. Потоа библиотеката, доколку има, па ќилимот и подот, па ако има столче за доење, масичка за преоблекување.

Најмалку внимание привлекуваат завесите, лустерите и уметничките дела. Интересно е што уметничките дела во речиси сите соби привлекуваат малку внимание, освен во домашната канцеларија каде се во фокусот, односно 4-ти на ранг листата на предмети што го привлекуваат вниманието.

Кујна

Најмногу внимание привлекува подот. Потоа следуваат кујнските елементи, па мијалникот. На четвртото место е работната површина, па прозорците, декоративните полици, рерната и осветлувањето.

Најмалку внимание се обрнува на тавчињата и тенџерињата, декоративното цвеќе, уметничките дела итн.

Домашна канцеларија

Чудно е што најмногу внимание привлекува столчето, а не самото биро. Високо рангиран е и комјутерскиот монитор, полиците, уметничките дела, килимот.

Најмалку внимание привлекува тастатурата и декоративното цвеќе.

Спална соба

Најмногу внимание привлекува креветот, па прозорците, декоративните перници, прекривката, ламбите до креветот и ноќните масички.

Најмалку внимание привлекуваат уметничките дела, подот и завесите.

Дневна соба

Најмногу внимание привлекува гарнитурата за седење, па масичката, килимите, каминот доколку има и декоративните перници.

Најмалку внимние привлекува телевизорот и орманчето под него, завесите и повторно уметничките дела.

С. С. | Црнобело