Како да го набљудувате метеорскиот дожд Персеиди овој викенд?

И овој август ќе можеме да уживаме во шоуто што го приредува метеорскиот дожд Персеиди, но, за жал, со многу помала видливост поради полната Месечина.

Персеидите се најпопуларниот метеорски дожд кој трае од 17 јули до 24 август. Бројот на видливи метеори постепено се зголемува и го достигнува пикот во средината на август.

Годинава пикот ќе биде ноќта помеѓу 12 и 13 август, по полноќ. Но, ако сте на неосветлено место, можно е да забележите метеори и неколку ноќи по 13-ти. 

Обично за време на пикот на Перседите, можат да се забележат и до 100 метеори во еден час, но годинава небото ќе биде осветлено од полната Месечина, па очекувајте помал број.

За да ги набљудувате метеорите не ви треба никаква опрема. Единствено треба да најдете место кое не е осветлено.

Исто така, на вашите очи ќе им требаат 20-тина минути да се привикнат на темницата за да можете да видите нешто.

На овој ЛИНК можете да погледнете интерактивна мапа која го покажува ноќното небо над неколку градови во Македонија (како Битола и Скопје). На мапата се прикажани соѕвездијата за полесно да се ориентирате.

На опцијата Change location (веднаш под мапата) можете да проверите дали го има вашиот град. Но и да го нема, Македонија има мала површина, што значи дека ноќното небо е генерално исто насекаде, па можете да следите за кој било град.

Интерактивната мапа ќе го покажува ноќното небо во живо штом ќе почне пикот на Персеидите.

Како настануваат Персеидите и од каде потекнува нивното име?

Метеорските дождови се остатоци од опашката на некоја комета низ кои минува Земјата.

Персеидите се остатоци од кометата Swift-Tuttle, а секој август нашата планета минува низ нив.

Метеорите што ги гледаме ние се всушснот остатоците од опашката кои навлегуваат во атмосферата и согоруваат.

Овие метеори се многу мали, па целосно согоруваат и не паѓаат на земјата.

Името Персеиди потекнува од соѕвездието Персеј – кога го гледаме дождот, изгледа како метеорите да доаѓаат оттаму.

Сепак, не мора да гледате само кон Персеј бидејќи метеорите можат да се забележат низ целото ноќно небо.

Спирова С. | Црнобело