Огромни подземни градби во познатите градови ширум светот за кои сигурно не сте слушнале

Знаевте ли дека на околу 40 метри под улиците на Неапол се крие цел лавиринт од тунели и стари градби?

Под многу европски градови кои се популарни туристички дестинации се кријат огромни комплекси од тунели и простории.

Неретко овие подземни структури се првите темели на градовите, а некогаш се правени отпосле, и тоа со разни намени.

Повеќето се користеле и како засолништа во време на воени напади, а скоро сите се барем делумно достапни за јавноста.

Шест вакви подземни комплекси во продолжение:

Vicus Caprarius, Рим

Веројатно ја знаете фонтаната Треви во Рим, но знаевте ли дека под неа се наоѓа подземно археолошко наоѓалиште?

Наоѓалиштето е познато како Vicus Carparirus, или „Воден град“, а се наоѓа на околу 9 метри под нивото на улицата.

Овде има стари резервоари за вода, како и остатоци од стара куќа.

Интересно е што Водниот град е само мал дел од неверојатниот свет што се крие под улиците на Рим.

Замокот Château de Brézé, Франција

Замокот се наоѓа во областа Лоара во Франција и се претпоставува дека бил изграден во 1060-та година.

Замокот бил реновиран во 16-тиот и 19-тиот век, па денес преовладува стилот од ренесансата. Сепак, си има задржано и детали од периодот кога бил изграден.

Најинтересниот детаљ во замокот се подрумите за кои се верува дека биле направени како засолниште од викинзи.

Во подрумите има тунели долги 3 километри, како и живеалишта, складови и места за чување добиток.

Подземниот град во Неапол, Италија

Околу 40 метри под улиците на Неапол се крие цел лавиринт од улици и стари градби.

Ова се всушност првите темели на градот кои биле направени уште пред 2.400 години.

Овде можете да видите римски театри, аквадукти, па дури и нешто од поново време – засолништа кои се користеле за време на Втората светска војна.

Рудникот за сол во Вјеличка, Полска

Вјеличка се наоѓа во јужниот дел на Полска, а под градот се крие рудник за сол.

Рудникот се користел за копање сол од 13-тиот век и е еден од најстарите во светот.

Сепак, поради намалувањето на цената на солта, но и поплавите во рудникот, комерцијалното вадење сол било прекинато во 1996 година.

Денес рудникот е историски музеј и е заштитен од УНЕСКО.

Покрај подземните лавиринти, овде можете да видите стара технологија која се користела за ископување сол, подземно езеро и бројни статуи издлабени од рудниците кои работеле внатре.

Најдлабоката точка на рудникот е околу 320 метри, а ходниците се долги вкупно 287 километри.

Подземниот град во П’лзењ, Чешка

Под чешкиот град познат по пивото се крие и подземен град.

Овој лавиринт е еден од најголемите подземни комплекси во Чешка, а тунелите имаат должина од вкупно 20 километри.

Изградбата почнала во 13-тиот век и на некои места подземниот град има и три нивоа под земја.

Подземниот град имал неколку намени, вклучувајќи складирање храна и вино и овозможување пристап до вода.

Се претпоставува и дека локалците ги користеле тунелите и како засолниште во време на војна и напади.

Римски галерии во Лисабон, Португалија

Подземните тунели во Лисабон биле откриени во 1771 година, а биле направени за да се стабилизираат некои градби на површината.

Во раниот 20-ти век, копмлексот бил користен и како подземна цистерна за вода. 

Конструкцијата започнала околу првиот век од нашата ера, за време на римската окупација.

Ова е всушност огромен комплекс од галерии и тунели кои се високи и до три метри, а имаат ширина од два до три метри.

Спирова С. | Црнобело