Кога некој има рак, не сите остануваат околу него: Нова серија на Нетфликс која го покажува влијанието на болеста врз животот

Најновата драма на Нетфликс „Од нула“ е претставена како емотивен шок за гледачите. Тоа е серија која ве тера да размислите за животот, за малите нешта, за вистините по кои плачете. Од убавината на Италија, ве тера и веднаш да резервирате лет за Италија. Љубовната приказна за Ејми и Лино не е само љубовна приказна. Тоа е една сурова вистина низ која поминуваат многу парови. Луѓе кои се допрени од болеста наречена рак.

„Од нула“ (From Scratch) е серија направена според истоимените мемоари на Темби Лок, и ја раскажува емотивната приказна за американската студентка Ејми (ја игра Зои Салдана) која патува во Фиренца, каде што се заљубува во сицилијански готвач по име Лино (Еугенио Мастрандреа).

Серијата во целост ја истражува нивната љубовна приказна која опфаќа сенешто. Но, моментот кога Лино ќе се разболи, нивните две семејства прават сѐ за да им помогнат низ овој тежок период.

Ракот не е лесна тема за приказна. Било тоа да е книга, или филм. Опфаќа делови кои луѓето нечесто сакаат да ги читаат и истражуваат. Тоа е една сурова (и сирова) вистина која, за жал, го окупира целото постоење на семејството кое поминува низ тоа.

Како некој кој ја има победено таа болест, и кој уште се бори со сите несакани ефекти од хемотерапијата, не можев а да не ја восприемам оваа серија длабоко и на еден посебен начин. Мислам дека откако ја изгледав не сум ист, како што и не се сите кои ја изгледале.

Секоја епизода е посебен удар. Некаде болен, некаде тажен, некаде вистински, некаде љубовен.

Но, секој удар ме потсетуваше на патот по кој и јас бев изодил. И колку сум благодарен што сум уште жив.

„Од нула“ е серија која покажува како ракот влијае на семејството, среќата, љубовта, финансиите, животот. Како кога некој има рак, не сите остануваат околу него. Се одделува каколот од цвеќињата.

Како е важно преку овие искуства, да се заплашиме, и да се заштитиме повеќе. Иако секој момент од секоја епизода поттикнува солзи и болка, серијата е добар водич, учител, искуство.

https://www.youtube.com/watch?v=vBHKSQ4MrJE&ab_channel=Netflix

Серијата може да ве научи на многу нешта. Топло ја препорачувам на сите.

Кирил Ангелов| Црнобело