7 забавни факти за октоподите – имаат сина крв и три срца

Од неверојатна интелигенција (можат да отвораат дури и тегли) до способност за камуфлажа, кои се најневеројатните факти за октоподите?

Октоподите се навистина интересни животни. Имаат големи очи, многу краци, меко тело, способност за менување облик, неверојатна интелигенција и што уште не.

Денес, околу 300 видови октоподи се распространети во водите ширум светот и живеат од коралните гребени, па сè до морското дно.

Неколку интересни факти за нив:

Сина крв

Октоподите користат хемоцијанин, протеин кој содржи бакар, за пренос на кислород, поради кој крвта добива сина боја.

Хемоцијанинот кога не е сврзан со кислород е скоро безбоен, но со кислород е син.

Три срца

Октоподите имаат три срца: две кои пумпаат крв кон шкргите и едно „системско“ срце кое ја пумпа крвта до телото.

Кога плови октоподот, системското срце може привремено да престане со чукање. Тие брзо се заморуваат и повеќе сакаат да ползат по морското дно, отколку да пловат.

Отров и опасност само од синиот прстенест октопод

Октоподите имаат жлезди околу клуновите кои создаваат отровни соединенија за парализа на пленот.

Но, вистинската опасност за луѓето е само синиот прстенест октопод (Blue‑ringed octopus), бидејќи неговиот отров може да биде смртоносен.

Камуфлажа, промена на боја и текстура

Октоподите можат брзо да ја менуваат бојата, осветленоста, шемата и дури текстурата на кожата за да се вклопат во средината или да комуницираат.

Неврони и во краците

Многу од невроните на октоподот се сместени не само во главниот мозок, туку и во краците, што овозможува тие краци да реагираат автономно на разни стимули и да вршат задачи независно.

Истражувања покажуваат дека еден крак може да добие сензорна информација и самостојно да изведува дел од моторните задачи, но сепак и централниот мозок ја координира целата акција.

Некои октоподи можат привремено да излезат на копно 

Некои видови октоподи, можат кратко време да се движат надвор од вода во таканаречени прошетки за лов на плен.

Пример е Abdopus aculeatus, кој е опишан како „посебен“ меѓу октоподите заради својата способност да се движи по копно.

Но, тие не можат да преживеат долго надвор од вода, нивните шкрги не се дизајнирани за дишење на воздух, па ризикуваат да се исушат или задушат.

Интелигенција и решавање проблеми

Октоподите се добро познати по способноста да решаваат загатки (на пример дури и да отворат тегли), да се прилагодуваат и да учат.

С. С. | Црнобело / фото: depositphotos.com