Вирално видео: Мачка сама си ги носи малечките во болница заради инфекција на очите

Пред неколку денови, улична мачка сама ги однела нејзините мачиња во болница во Измир, за кои подоцна лекарите утврдиле дека имаат инфекција на очите. Тие веднаш ја згрижиле мајката со малите мачиња, а снимиле и видео на кое се гледа преслаткиот момент.

Лекарите од болница во Измир, Турција, останале без зборови кога забележале како влегува мачка која носи мало маче во устата.

Наводно, станува збор за улична мачка, која тие редовно ја хранеле, но не знаеле дека има и мали мачиња.

„Често ѝ оставаме храна и вода на мачката бидејќи постојано ја гледаме околу болницата. Сепак, не знаевме дека се омачила и дека има мали мачиња“, изјавил еден од лекарите за локален медиум.

Лекарите и медицинските сестри кои ја забележале мачката ги прегледале мачињата и кога сфатиле дека имаат инфекција на очите, веднаш се јавиле на ветеринар.

„Како што ни почна утринската смена и почнаа да влегуваат пациенти, покрај нив се појави мачката со мачињата. Очигледно бараше помош бидејќи мјаукаше долго време. Откако внимателно ги прегледавме мачињата, сфативме дека не можат да ги отворат очите поради инфекција. Веднаш се консултиравме со ветеринар кој ни кажа како да постапиме. Кога мачињата ги отворија очите, бевме пресреќни!“

После третманот со капки за очи, лекарите веднаш нашле и засолниште за мајката и мачињата.

„Ова е првпат да ни се случи нешто вакво. Многу ни е мило што мачињата закрепнаа и сега се на безбедно“.

Лекарите успеале и да го снимаат моментот кога мачката влегува во болницата, а видеото веќе стана вирално.

Оние, пак, кои го изгледале се воодушевени од постапката на мачката, но и грижливоста на лекарите:

„Неверојатна мајка“.

„Сигурно гледала како луѓето влегуваат во болницата, па си помислила дека ќе можат да ѝ помогнат и нејзе“.

„Неверојатно е колку луѓето во Турција се грижат за уличните мачки“.

„Сите мајки се исти, без разлика дали станува збор за човек или друго живо суштество“.

Спирова С. | Црнобело