6 лесни вежби за подобрување на рамнотежата – идеални се за повозрасни

Следниве вежби ќе ви помогнат да ја подобрите рамнотежата, но и да го намалите ризикот од повреди. А бидејќи се лесни, идеални се ако сте повозрасни или не сте баш во форма.

Важно е да правиме вежби што ни ја подобруваат рамнотежата бидејќи со ова го намалуваме ризикот од повреди, дури и кога сме помлади.

Вежбите во продолжение делуваат едноставно и навистина се, но ги активираат мускулите кои ни го стабилизираат телото.

А, тоа што не бараат голем напор ги прави идеални за повозрасни или луѓе кои не се многу физички активни, но сепак сакаат да ја подобрат рамнотежата.

Шест вежби за подобрување на рамнотежата:

Прва вежба

Ова е вежба за која ќе ви биде потребен стол и иако делува како многу лесна, не значи дека нема ефект.

Застанете пред стол со нозете во ширина на колковите.

Бавно доближете го задникот до столот, но немојте да седнувате.

Останете во таа положба две-три секунди, па исправете се.

Повторете ја вежбата десетпати.

Втора вежба

Застанете исправено со нозете во ширина на колковите. Рацете поставете ги како во положба за трчање.

Кренете го едното колено, така што горниот дел од ногата ќе ви биде паралелен со земјата.

Ако не можете толку, во ред е да ја кренете и помалку, но осигурете се дека грбот ќе ви остане исправен.

Држете ја ногата крената секунда-две, бавно спуштете ја на земјата, па повторете го движењето со другата нога.

Направете по десет повторувања со двете нозе.

Трета вежба

Застанете исправено со нозете во ширина на колковите.

Бавно навалете ја главата кон назад, па кон напред, а потоа свртете ја кон едната, па кон другата страна.

Повторувајте ги движењата 30 секунди, направете кратка пауза, па повторете уште 30 секунди.

Ако почувствувате вртоглавица, правете ја вежбата побавно.

Четврта вежба

Застанете исправено и кренете ги рацете странично, така што ќе ви бидат паралелни со подот.

Бавно исчекорете со десната нога, па поставете го десното стапало точно пред левото.

Направете 15 до 20 чекори, направете пауза, па повторете уште еднаш.

Петта вежба

Застанете исправено со нозете во ширина на колковите.

Префрлете ја тежината на десната нога и свиткајте го левото колено.

Со левата рака фатете го левото стапало – треба да почувствувате истегнување на предниот дел од левата нога.

Останете во оваа положба околу 30 секунди, па повторете со другата нога.

Шеста вежба

Застанете исправено со нозете во ширина на колковите. Поставете ги рацете на колковите.

Странично подигнете ја десната нога, без да ја виткате и држете ја положбата до 30 секунди.

Вратете ја ногата не земјата и повторете со другата.

Направете по десет повторувања со секоја нога.

Спирова С. | Црнобело